Man se liggaam in Apiesrivier gevind

(Foto verskaf deur Stad Tshwane)

ʼn Man se liggaam is Saterdag uit die Apiesrivier naby die Pretoriase dieretuin gehaal ná hy die vorige dag in die moeilikheid beland het.

Thabo Charles Mabaso, woordvoerder van die munisipaliteit, sê Tshwane-nooddienste is Saterdag omstreeks 16:50 ʼn oproep ontvang dat drie mans deur die Apiesrivier meegesleur is. Dié rivier was in vloed weens reën en storms die vorige dag. “Personeel van Bosman-brandweer en Innesdale-brandweer is na die toneel ontplooi.”

Twee mans op die toneel het gesê hulle is die vorige dag meegesleur, maar kon uit die water kom. Hul vriend kon egter nie uit die water kom nie.

“Die polisie se duikeenheid het na die derde man gesoek en die liggaam van ʼn man is onder ʼn brug naby Rosslynweg gevind.”

ʼn Beskrywing van die liggaam, wat uit die water gehaal is, is met brandbestryders gedeel wat nog op die toneel naby die dieretuin was saam met die twee vriende. Hulle het bevestig dit is hul vriend wat meegesleur is.

“Ons wil graag mense aanraai om brûe oor riviere en riviere te vermy wanneer dit reën. Dit is moontlik dat dit stroomop reën en dat die watervlak onverwags kan styg.”

Mabaso sê watervlakke kan ook vinnig en sonder waarskuwing styg weens water wat uit die stormwaterstelsel stroom.

Die omstandighede rondom die man se verdrinking word verder deur die polisie ondersoek.