Man se liggaam twee weke ná ongeluk gevind

Tyrone Lessing

Die 27-jarige man van Alberton wat sowat twee weke gelede oënskynlik spoorloos verdwyn het nadat hy in ʼn ongeluk betrokke was, se liggaam is meters van die ongelukstoneel af gevind.

Die familie van Tyrone Lessing is kwaad vir die polisie en meen hulle is twee weke lank in die duister gehou terwyl Tyrone se liggaam Vrydag etlike meter van waar hy in ʼn ongeluk was, gevind is.

Tyrone was óf die aand van 24 Augustus óf in die vroeë oggendure van 25 Augustus op die hoek van JG Strijdomweg en Rubystraat in Mayberry Park in ʼn ongeluk. Sy oranje Mini Cooper is erg beskadig hier gevind, maar daar was geen teken van Tyrone nie.

Jordan Lessing, Tyrone se broer, het vroeër gesê sy broer se selfoon is ook in die motor gevind. ʼn Grootskaalse soektog na Tyrone is onmiddellik begin.

Jordan en hulle ma, Charlotte O’Connell, het al die hospitale in die omgewing óf besoek óf geskakel om Tyrone te probeer opspoor, maar sonder welslae.

Hulle het ook lykshuise gekontak en pamflette wat Pink Ladies, ʼn organisasie wat hom daarop toespits om vermiste persone op te spoor, gemaak het oral in die gebied versprei.

Volgens Tyrone is sy broer se liggaam Vrydag in ʼn riooldrein op die ongelukstoneel gevind. “Die familie vat dit baie swaar.”

Die familie het ook baie onbeantwoorde vrae oor hoe Tyrone se lyk nie vroeër gevind kon word as hy heeltyd daar by die ongelukstoneel was nie.

Kapt. André de Jager, woordvoerder van die polisie, het bevestig Tyrone se liggaam is gevind. Volgens hom ondersoek die polisie in die stadium ʼn saak van strafbare manslag en duur die ondersoek na die voorval voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

54 Kommentare

jongste oudste gewildste
Outoppie

Dit kan net met ons polisie gebeur. Oë is nie waar hul moet wees

Strandloper

Tragies. Sterkte aan die familie. Poliesie is ook nie meer wat dit was nie!

sweis

Is daar nog enige departement in die huidige regering wat bevoeg is om hulle werk te doen,ek weet nie wie was die ergste vernietigende vent in afrika nie mugabe of de klerk.

Pampoen

Hoekom het die familie nie self daar gaan soek nie?

Sophia

Waarom nie snuffelhonde gebruik nie?