Man se skietdood op plaas lei tot vernietiging

Suikerrietlande in die Eshowe-gebied in KwaZulu-Natal is tydens ʼn gewelddadige betoging aan die brand gesteek (Maart 2018). Foto: Facebook via Intelligence Bureau SA

Honderde woedende gemeenskapslede het op ʼn vernietigingstog gegaan na die skietdood van ʼn 30-jarige man op ‘n plaas in Eshowe in KwaZulu-Natal.

Brig. Vishnu Naidoo, woordvoerder van die polisie, het gesê twee mans het Dinsdag visgevang by ʼn dam op die plaas Gqobkohani.

“Hulle is deur ‘n veiligheidswag gekonfronteer en versoek om die plaas te verlaat waarna ‘n onderonsie uitgebreek het. Dit het glo daartoe gelei dat die veiligheidswag een van die mans, Spamandla Xulu (30), doodgeskiet het. Die ander man kon ongedeerd wegkom.”

Volgens Naidoo is die veiligheidswag in hegtenis geneem op aanklag van moord. Hy het Donderdag in die hof verskyn en bly in aanhouding tot 22 Maart wanneer hy weer in die hof moet verskyn.

Die toneel in die Eshowe-gebied in KwaZulu-Natal tydens ʼn gewelddadige betoging (Maart 2018). Foto: Facebook via Intelligence Bureau SA

“Woedende gemeenskapslede van Umlalazi en Eshowe het die afgelope twee dae die strate ingevaar en bande aan die brand gesteek op die R66. Hulle het hierna die plaashuis in Gqobhokani en die eienaar van die plaas se suikerrietlande ook aan die brand gesteek.” Naidoo het gesê brande is ook in die aangrensende plantasies gestig.

Genl. Khehla John Sitole, nasionale polisiekommissaris, het intussen ʼn beroep op die gemeenskappe van Umlalazi en Eshowe gedoen vir kalmte. “Die man wat Xulu glo vermoor het, is in hegtenis geneem en gemeenskapslede moet die reg toelaat om sy gang te gaan,” het hy gesê.

Sitole het die provinsiale polisiekommissaris versoek om ʼn ondersoektaakspan aan te stel om die voorvalle van brandstigting te ondersoek en diegene wat daarvoor verantwoordelik was, in hegtenis te neem en te vervolg. “Die tipe gedrag is krimineel en onaanvaarbaar.”

Volgens Sitole is lede van die openbareorde-polisie, taktiesereaksie-eenheid en beamptes van plaaslike polisiestasies na die gebied ontplooi om die situasie te stabiliseer. “Die vernietiging van eiendom is nie die oplossing vir enige probleem nie, maar eerder ʼn misdaad wat strafregtelik is. Dit help ook nie om ʼn situasie reg te stel nie,” het Sitole bygevoeg.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

32 Kommentare