Mboweni-twiets dui daarop dat ‘e-tol hier is om te bly’, sê DA

Tito Mboweni, minister van finansies. Foto: Shayne Robinson/SAPA

Tito Mboweni, minister van finansies, se reaksie op Twitter rakende die Gautengse premier, David Makhura, se opmerkings oor e-tol tydens sy provinsiale toespraak “bevestig net wat die DA reeds gesê het dat e-tol hier is om te bly onder die ANC se regering,” het die party Saterdag gesê.

Makhura het vroeër vandeesweek in sy provinsiale rede gesê die e-tolstelsel het geen toekoms in Suid-Afrika nie. Die minister stem egter nie hiermee saam nie en het dit in verskeie twiets duidelik gemaak dat dié stelsel nêrens heen gaan nie.

Mboweni het die afgelope paar dae verskeie twiets aan Makhura gerig waarin hy onder meer gesê het dat die e-tolstelsel nie onder sy toesig verwyder sal word nie.

“So, as jy in ʼn tolpadinfrastruktuur belê, verwag jy ʼn opbrengs vir baie jare soos per kontrak. Reg? Nie die koste van jou belegging vandag nie. Toekomstige opbrengste. Dit is wat jy doen in die sakewêreld. Premier Makhura, korrek? Of mis ek iets hier?,” lui een van die twiets terwyl hy in ʼn ander volhou dat die gebruiker vir infrastruktuur op snelweë behoort te betaal.

Volgens Solly Msimanga, DA-koukusleier in Gauteng, is dit Mboweni wat die land se “toutjies trek” en dus die finale sê het oor hoe belastinggeld ingesamel word.

“Die ANC praat voortdurend met ʼn gesplete tong oor die saak. Wanneer dit gerieflik is, beweer hulle dat die stelsel geskrap sal word, maar wanneer die waarheid uitkom, is dit duidelik dat hulle nie omgee vir Gautengse inwoners se lot nie,” het Msimanga in ʼn verklaring gesê.

In die jare sedert e-tol op die been gebring is, het talle ondernemings gesluit weens die onregverdige kostes wat hulle nie kon dra nie, meen Msimanga.

Luidens die verklaring is private padgebruikers die afgelope paar jaar gedreig met kriminele rekords indien hulle geweier het om van hul hardverdiende geld op e-tol te bestee. Soveel as 90% van die geld wat ingesamel is van diegene wat betaal het, is ook na die buiteland gestuur en die balans het die Suid-Afrikaanse Nasionale Padagentskap (Sanral) se verbande betaal.

Geld wat ingesamel is deur ander inkomstestrome, soos lisensiehernuwingsgeld en heffings het Suid-Afrikaanse paaie betaal. “Afgedrukte afpersingskemas” soos die e-tolstelsel het egter nie, lui die verklaring.

“Met die ekonomie soos dit tans daaruit sien en Gautengers wat hul rieme dunner moet sny, kan hulle nie addisionele en onregverdige belasting bekostig nie. Mboweni se uitsprake dat mense wat e-tol nie kan bekostig nie dit nie betaal nie omdat openbare vervoer daarvan vrygestel is, wys net hoe ver verwyderd die ANC van die geleefde ervaring van die oorgrote meerderheid van Gauteng se inwoners is,” het Msimanga gesê.

Die DA het Donderdag gesê indien die stelsel in Augustus vanjaar nog in werking is, sal die party stappe doen om ʼn interregeringsgeskil te verklaar om die stelsel ter syde te stel. “Die Gautengse mense kan nie meer deur die ANC se dubbele standaarde oor e-tol geflous word nie,” het Msimanga gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Cherokee

Mboweni vra of hy iets mis. Ek sou antwoord, ja beslis. Comin sense. Want die e-tol stelsel is op die Transvaler afgedwing.

Chris Ws

Mnr.Mboweni ons betaal reeds deur voertuig lisensierings gelde en die brandstof heffing.Dis meer as genoeg as jy die bedrog in die regering stop .So stop eers die grootskaalse bedrog pleging in die anc regering.Dan sal daar genoeg geld wees om paaie te bou en oues te herstel of op te gradeer en kan ALLE tolhekke gesluit word en e-tol begrawe word.VEE EERS VOOR DIE REGERING SE DEUR!

Heinrich van Zyl

Ek verkies ook dat e-tol bly. Sodoende betaal ek niks.
Indien dit deel word van die brandstofheffing of lisensiefooie, sal ek ook moet betaal.

Willehond

Tito die forelle wat jy so lekker Dullstroom vang kos nou R50 miljoen vir een! The user must pay!!!! Kry vir jou!

Lana Taljaard

Dis wat hy dink