Mej. SA binnekort op Paryse loopplank te sien

Natasha Joubert in Parys, Frankryk. (Foto: Verskaf)

Mej. Suid-Afrika, Natasha Joubert, is genooi om in Oktober vanjaar gesig te wys op die Paryse modeweek in Frankryk, waar sy as eregas vir L’Oréal Paris sal optree.

Die internasionale skoonheidshandelsmerk was vroeër vanjaar ŉ amptelike borg vir die Mej. SA-kompetisie. Joubert sal as deel van die maatskappy se ikoniese Walk Your Worth-geleentheid ŉ spesiale verskyning maak.

Die bekende Le Défilé-geleentheid vind op 1 Oktober by die École Militaire in Parys, Frankryk, plaas. Die doel van die geleentheid is om alle vroue te inspireer om die toekoms met selfvertroue te betree.

Joubert sal ook ŉ toer deur een van L’Oréal se laboratoriums onderneem.

“Dit is so ŉ voorreg om in hierdie wonderlike stad, wat die episentrum van mode is, te wees. Ek voel baie gelukkig om uitgenooi te wees na hierdie geleentheid,” sê Joubert.

Die Mej. SA-span beskryf L’Oréal Paris se borgskap as ŉ “baanbrekersooreenkoms”, en sê die borgskap stem ten volle ooreen met die skoonheidskompetisie se handelsmerk.

“[L’Oréal Paris se] toewyding tot inklusiwiteit en diversiteit is in ooreenstemming met vanjaar se reëlveranderinge, wat onder meer behels dat getroude vroue en vroue met kinders vir die eerste keer aan die kompetisie kon deelneem,” sê Stephanie Weil, uitvoerende hoof van die Mej. SA-organisasie.

“Ons glo daarin om die skoonheid van individualiteit en diversiteit van alle Suid-Afrikaanse vroue te vier. Daarom is ons trots dat Natasha genooi is om die Walk Your Worth-geleentheid by te woon.”

“Ons glo as vroue bemagtig is, kan hulle enigiets bereik wat hulle wil en ons is verheug om deel te wees van hierdie platform,” sê Ayanda Mackay, bemarkingsbestuurder vir L’Oréal Paris Skin, Makeup and Hair.

L’Oréal Paris is ook ŉ amptelike vennoot van die Paryse modeweek.