Melkrivier-plaasaanval: ‘Dis ʼn wonderwerk dat hy lewe’

Berdus Henrico en Estelle Nieuwenhuys. Foto: Via Facebook

Een van die drie koeëls wat Berdus Henrico (39) Dinsdag tydens ʼn plaasaanval in Limpopo getref het, het die hoofslagaar in sy nek skrams gemis. Dié koeël het hom onder sy kaak getref en is agter by sy nek uit.

Die ander twee koeëls het in sy skouer vasgesit. Een koeël is eers Donderdagmiddag verwyder en Henrico gaan tot Maandag moet wag sodat toetse gedoen kan word om vas te stel wanneer die oorblywende koeël verwyder kan word.

Chrisna Henrico-Van der Merwe, Henrico se suster, het Vrydag aan Maroela Media gesê haar broer is intussen uit die hospitaal ontslaan en is op sterk pynmedikasie en antibiotika.

“Dinge het uiteindelik begin beter gaan nadat ʼn private dokter in Bela-Bela onderneem het om hom te behandel, want hy was sedert die aanval in staatshospitale en het skanderings ondergaan, maar is nie geopereer om die koeëls te verwyder nie. Sy wonde is ook nie behoorlik skoongemaak nie,” het Van der Merwe gesê.

“Die private dokter het gereël dat Berdus uit die hospitaal ontslaan word en het ook vervoer van die hospitaal na sy praktyk gereël. Die een koeël het vlak in sy skouer gesit en die dokter kon dit sommer in sy praktyk uithaal. Sy wonde is ook daar vir die eerste keer behoorlik skoongemaak. Die dokter het my broer ontslaan sodat hy by die huis kan aansterk en nie meer frustrasie in ʼn hospitaal deurmaak nie. Ons verkies dit so, want nou kan hy en sy verloofde saam wees en deur die trauma werk, waar toe hy in die hospitaal was, hulle mekaar nie die heeltyd kon sien nie.”

Henrico en sy verloofde, Estelle Nieuwenhuys, bly tans by familie in Bela-Bela. Hy moet Maandag ʼn ortopeed gaan sien, waarna verdere mediese behandeling bepaal sal word.

Maroela Media het vroeër berig die verloofde paartjie is Dinsdagaand omstreeks 21:00 deur drie gewapende verdagtes op ʼn plaas buite Vaalwater aangeval. Hulle was alleen in die huis op ʼn plaas in die Melkrivier-omgewing waar Henrico die plaas vir iemand bestuur.

Dit is nie duidelik hoe lank die aanvallers in die huis was nie. Henrico en Nieuwenhuys het in ʼn stadium in ʼn stoeiery met die verdagtes betrokke geraak, waartydens Henrico drie keer geskiet en aangerand is. Die aanvallers het ook op Nieuwenhuys geskiet en haar skrams getref.

Die aanvallers het met elektriese ware en ʼn geweer op die vlug geslaan.

Lt.kol. Moatshe Ngoepe, provinsiale polisiewoordvoerder, het Vrydag aan Maroela Media gesê niemand is nog in verband met die voorval in hegtenis geneem nie.

Die Dorset-polisie ondersoek ʼn saak van huisroof en poging tot moord. Die ondersoek duur voort.

Van der Merwe het intussen ʼn trust gestig om haar broer met mediese onkostes te help, aangesien hy nie ʼn mediese fonds het nie. Mense wat ʼn bydrae wil maak, kan vir haar ʼn e-pos stuur by [email protected].

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Lollie

Sterkte aan die paartjie! DUISENDE dankies aan die dokter (onbekend). Wens daar was meer dokters soos u wat dit nog doen uit die liefde van die saak en nie net vir geld nie! Doen so voort! Dit gaan nie ongesiens verby nie

Willie

Dankie aan die Dr.. Hoe swak is die hospitale nie… Mens moet eindelik die minister van Polisie kan dagvaar vir die volkmoord!

Drieks

Hierdie is EEF se werk met die toestemming van ANC.
Tatta Huisgenoot en RSG radio ook,

Eish

Mag die Hemelse Vader my vergewe dat my eerste reaksie gebrek aan naasteliefde is.

Piet

Plaas bestuurder sonder mediese voordele ? Is boerdery oor die algemeen nie ook n gevaarlike werk nie ?