Minister paai ná nog geldkrane toegedraai word

Lynne Brown, minister van openbare ondernemings, het beleggers gerusgestel dat Suid-Afrika se semistaatsinstellings stabiel is nadat ʼn tweede batebestuurder aangekondig het dat hy nie die land se maatskappye in staatsbesit verder gaan finansier nie.

“Ek wil alle beleggers verseker dat Eskom en Transnet geloofwaardige en betroubare leners is met sterk kredietgrondbeginsels soos blyk uit hul onderskeie kredietprofiele,” het die minister in ʼn verklaring gesê.

“Hul vertonings die afgelope boekjaar bevestig hul sterk beheerstrukture insluitend die stabiele direksies en uitvoerende komitees.”

Brown het die verklaring uitgereik nadat Denemarke se Jyske Bank aangekondig het dat hy sy finansiering aan Eskom gaan stopsit. Dit het gevolg ʼn dag nadat Futuregrowth aangekondig het dat hy nie meer bykomende finansiering aan talle staatsbeheerde maatskappye sal gee nie.

Futuregrowth, ʼn spesialis-beleggingsmaatskappy, bestuur bates van sowat R170 miljard namens Old Mutual-beleggers. Die maatskappy finansier onder meer Eskom, Transnet, Sanral, die Landbank, die Nywerheidsontwikkelingskorporasie en die Suid-Afrikaanse Ontwikkelingsbank.

Die minister het egter daarop aangedring dat die direksies van Eskom én Transnet hul vertrouenspligte suksesvol uitgevoer het en dat albei maatskappye ongekwalifiseerde ouditverslae ontvang het.

“Dit is ʼn kritiese aanwyser vir enige internasionale of nasionale belegger om te belê in die toekoms van albei maatskappye en in Suid-Afrika,” het Brown gesê.

“As die aandeelhouerverteenwoordiger van die regering in dié twee maatskappye doen ek ʼn beroep op huidige en moontlike toekomstige beleggers om direk met my en die maatskappye in aanraking te kom oor enige saak van kommer ten opsigte van hul beleggings.”

Futuregrowth het Woensdag in ʼn verklaring binnegevegte in die regering en die beweerde aanslag op die onafhanklikheid van die tesourie as redes vir sy besluit aangevoer.