Motorfietsongeluk eis Pta-tiener

Argieffoto

ʼn 17-jarige leerder aan Hoërskool Garsfontein in die ooste van Pretoria is Vrydagmiddag dood toe hy ná skool in ʼn motorfietsongeluk betrokke was.

Volgens Gareth Pahl, woordvoerder van Hi-Risk Unit se mediese eenheid, het die ongeluk omstreeks 13:00 naby die aansluiting van Serenestraat en Kommetjiesingel plaasgevind.

“Hy het die aansluiting van Jacquelineweg se kant af genader toe hy om een of ander rede beheer oor sy motorfiets verloor en teen ʼn boom langs die pad gebots het,” het Pahl Saterdag aan Maroela Media gesê.

Die seun is in ʼn kritieke toestand aangetref. Hy is op die toneel behandel en in ʼn ambulans na ʼn nabygeleë hospitaal gehaas.

“Daar is onverpoosd in die ambulans en in die hospitaal noodhulp op hom toegepas, maar ná ʼn poging wat ʼn hele ruk geduur het, is hy in die hospitaal dood.”

Pahl het gesê daar was vermoedelik nie nog ʼn voertuig in die ongeluk betrokke nie.

Meer besonderhede oor die ongeluk is nie bekend nie en word deur die polisie ondersoek.

Kapt. Colette Weilbach, woordvoerder van die polisie, het die ongeluk aan Maroela Media bevestig.

Die Garsfontein-polisie doen ʼn geregtelike doodsondersoek.

Maroela Media het navraag oor die leerder by die skool gedoen en wag vir terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Hennie

Tragies!! Sterkte aan sy ouers.

LMF

Agge neeeee so hartseer ek heti woorde nie almal gaan seker nou weer n eiertjie lê oor motorfietse en spoed maar ASB hier is n kind dood en daar gebeur meer kar ongelukke as motorfietse ek op sektor en net in die middag in my area was daar noual 5 ongelukke RIV

Avokado

Rus in vrede Beer.

Rita de Kock

Ek is 66 en vandat ek op skool was sterf daar elke jaar jong mense. Motorfietse, karre en watter manier ook al. Dit is jong mense weggeruk en is elke keer ontstellend. Kan net die ouers krag van bowe toebid in hierdie hartseertyd.

Daan

Innige simpatie aan die familie.LMF,feit is dat indien die klein botsings waarin ek betrokke was in motorvoertuie,op ‘n motorfiets plaasgevind het,dan sou ek verseker ernstig beseer of dood gewees het. Mens is maar net meer blootgestel en kwesbaar op ‘n motorfiets. Ouers,koop liewer vir jou kind ‘n motor as jy lief is vir hom,en jy is wel.Of vat hom self skool toe,of reel vir vervoer.As hy rebelleer vat hom hospitale toe of praat met ambulanspersoneel.