NSFAS ontken R5 miljard-betaling aan student

Die skermskoot wat wyd versprei word.

Die nasionale finansiële hulpskema vir studente (NSFAS) het ontken dat hy R5 miljard in ʼn student se bankrekening inbetaal het.

ʼn Skermskoot van ʼn SMS-kennisgewing word wyd op sosiale media versprei wat glo wys dat R5 miljard in ʼn rekening inbetaal is en “Nsfas” wat as verwysing aangedui word.

Dr. Randall Carolissen, NSFAS-administrateur, het dit egter ten sterkste ontken en gesê NSFAS het nie ʼn betaling van R5 miljard aan enige student gemaak nie.

Dit kom nadat NSFAS in 2017 weens ʼn administratiewe fout ʼn astronomiese R14 miljoen se studiegeld aan ʼn student betaal het in plaas van slegs R1 400 vir haar maandelikse kostoelaag.

ʼn Foto van ʼn strokie wat wyd op sosiale media gedeel is wat ʼn balans van meer as R13 miljoen in Sibongile Mani se rekening toon. Foto: Twitter

Sibongile Mani, ʼn student aan die Walter Sisulu Universiteit (WSU), is later van diefstal aangekla aangesien sy oor ʼn tydperk van drie maande op ’n inkopietog van R818 000 gegaan het, voor die owerhede onraad vermoed het. Die saak duur steeds voort.

Dr. Blade Nzimande, minister van hoër onderwys, wetenskap en tegnologie, sal intussen Dinsdag besoek aan NSFAS se kantoor in Wynberg, Kaapstad, aflê.

Die minister sal tydens sy besoek deur die NSFAS-administrateur en senior bestuur ingelig word oor die vordering wat gemaak is met die verwerking van betalings vir NSFAS-studente vir die 2020‑ akademiese jaar.

Nzimande sal ook ingelig word oor die prosesse wat lei tot die finansieringsbesluite deur NSFAS vir sowel universiteits- as TVET-studente.

Na afloop van die inligtingsessie sal die minister op ʼn toer van die NSFAS-gebou geneem word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Frederik

Dit is belaglik, mense maak foute maar die fout is ongelooflik!!! Kan so n foutjie nie maar in my bankrekening plaasvind nie??

RS

Ons kan almal doen met so n foutjie.

Snowball

Julle, hulle sukkel vreeslik met die nulle!!

jinny jualinda

Nog een wat nie kan tel nie.

Wondermaarnet

Dit is nie die eerste keer wat ‘n fout insluip nie. Dit is seker nie ‘n fout nie en doelbewus gedoen, want daar is kaders wat wil deel in die student se vet beurs.