Omstrede Bushiri-egpaar vlug landuit

Die Bushiri-egpaar (Foto: ANA)

Die selfverklaarde profeet Shepherd Bushiri en sy vrou, Mary, is terug in Malawi nadat hulle ondanks hul streng borgtogvoorwaardes steeds landuit kon vlug.

Die egpaar, wat by die Enlightened Christian Gathering Church (ECG) betrokke is, se borgtog is vroeër toegestaan op voorwaarde dat hulle die oorspronklike titelakte van hul eiendom in die Midstream-landgoed in Centurion aan die staat oorhandig. Hul bewegings is tot Gauteng en Noordwes beperk en die egpaar moes elke Maandag en Vrydag by die polisie aanmeld.

Hulle moes ook hul paspoorte inhandig.

Shepherd Bushiri het egter vanoggend op Facebook aangekondig hy en Mary is in Malawi.

“Daar was tot dusver duidelike en ooglopende pogings om my, my vrou en my familie dood te maak en ondanks ons herhaalde pogings om dit by die owerhede aan te meld, was daar nog nooit staatsbeskerming nie. Om na Malawi te kom is ʼn taktiese onttrekking uit Suid-Afrika wat net gedoen is om ons lewe te beskerm,” lui Bushiri se boodskap.

Hy sê die egpaar volstaan by hul onskuld, maar sal dit nie kan bewys as hulle dood is nie.

Die twee was twee weke agter tralies voor hul borgtog toegestaan is en Bushiri sê hulle is steeds nie seker wanneer hul verhoor gaan begin nie.

“Ek wil dit duidelik stel dat ons terugkeer na Malawi nie onderneem is om weg te hardloop van die verhoor nie. Glad nie. Al wat ek en my vrou wil doen, is om ons name in ere te herstel in ʼn strafregstelsel wat regverdig en onpartydig is.”

Bushiri eis nou dat die Suid-Afrikaanse regering die egpaar se veiligheid waarborg terwyl hulle hier is.

Hulle eis ʼn onderneming dat hul borgtog nie teruggetrek gaan word nie, dat die beamptes betrokke by die ondersoek, inhegtenisneming en vervolging hulself aan die saak onttrek, asook dat die Suid-Afrikaanse regering die probleme wat Bushiri geopper en die klagtes wat hy aanhangig gemaak het, sal ondersoek.

“Laastens wil ek hê die Suid-Afrikaanse regering moet onafhanklike en professionele ondersoekers en aanklaers aanstel wat onafhanklike besluite oor die kwessies waarvan ons beskuldig word, kan neem.”

Indien daar aan dié eise voldoen word, sal Bushiri hom weer “beskikbaar stel” om voor ʼn Suid-Afrikaanse hof te verskyn. Bushiri sê hy vra ook die Malawi-regering om in dié verband met die Suid-Afrikaanse owerhede saam te werk.

Maroela Media het vroeër berig die Bushiri-egpaar en hul medebeskuldigdes word van betrokkenheid by bedrog en geldwassery ten bedrae van R102 miljoen beskuldig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Persheks Adri

Geweet hulle gaan vlug! Wie op dees aarde dink hy is hy om te “demand”? Die owerhede luister NIE en hou aan borg gee en dit vir R102 miljoen se bedrog! Die regstelsel is voorwaar ‘n teleurstelling pffft

Willem

En daar is die bewyse dat jy sonder paspoort die land kan verlaat

Paul

Siestog ons gevreesde regstelsel n grap

Anel

Nou met wie se hulp het hulle in Malawi gekom? Hulle is misdadigers en nou wil hulle kom eise stel?

Joe Olivier

ramaphosa het mos gister lekker saam met Malawi se prez gekuier in Pta. Die 2tjies is toe seker saam met hul prez hier weg sonder paspoorte. Wonder of hul ook vanaf Waterkloof gevlieg het.