(Foto: Maroela Media)
Die DA kon dié week daarin slaag om ʼn wyk in Thabazimbi te behou. Dit nadat die DA in onlangse tussenverkiesings heelwat wyke aan ander politieke partye afgestaan het, insluitend in Kaapstad en Vredendal in die Wes-Kaap en Bethal in Mpumalanga.
“Ons het daarin geslaag om ons ondersteuningsbasis te versterk en het met een persentasiepunt gegroei,” het die party Donderdag in ʼn verklaring gesê.
Die DA het 33,58% van Thabazimbi wyk 2 – wat die grootste gedeelte van die dorp beslaan – se stemme ontvang. Die Vryheidsfront Plus was tweede met 28,45% van die stemme en die ANC derde met 27,38% van die stemme. Die EFF het 7,07% van die stemme ontvang. Die Thabazimbi- vereniging vir belastingbetalers het ook aandag getrek met 3,54% van die stemme.
Die DA het ook onlangs Tokkie Swanepoel verwelkom as sy nuwe raadslid, nadat dr. Bertie Joubert, die DA-wyksraadslid en speaker van die plaaslike munisipaliteit, onlangs bedank het. Joubert wil nou eerder op sy akademiese loopbaan fokus.
“Ons vertrou volkome in ons nuwe raadslid, Tokkie Swanepoel, wat saam met die DA-koukus in Thabazimbi gereed is om inwoners met hernude krag te dien,” sê Jacques Smalle, die DA se provinsiale leier vir Limpopo.
Mooi so DA. Dit is net die begin.
Fantastiese groei deur die VF Plus! Doen so voort VF Plus. Trots op julle!