Optrede gevra teen medici wat ‘vals nuus’ oor Covid-19-entstof versprei  

(Foto: Unsplash)

Die Suid-Afrikaanse Mediese Vereniging (Sama) het ʼn beroep op die Raad vir Gesondheidsberoepe (RGB) gedoen om mediese beroepslui wat hul etiese pligte oortree deur die verkeerde inligting oor die Covid-19-entstof te versprei, te dissiplineer.

Volgens Sama het hy met groot kommer kennis geneem van die verspreiding van valse inligting oor Covid-19-entstowwe deur individue in die mediese beroep. “Medici wat verkeerde inligting oor Covid-19-entstowwe versprei, kan mense ontmoedig om ingeënt te word, wat tot voorkombare lewensverlies kan lei,” het Sama in ʼn verklaring gesê.

Dit kom nadat ʼn herrie ontstaan het oor dr. Susan Vosloo, Suid-Afrika se eerste vrouehartchirurg en ʼn vooraanstaande dokter wie se mening wyd gerespekteer word, se uitlatings rakende Covid-19-entstowwe.

Vosloo sê in ʼn video wat op die BitChute-platform gelaai is, onder meer dat die “entstof nie ingebring is vir Covid nie, maar dat Covid ingebring is vir die entstof”. Vosloo sê ook vlae van die virus – wanneer dit sal kom en gaan – word voorspel en dat ʼn “mens wonder hoe dit gebeur”.

Volgens Sama moet persoonlike oortuigings en menings nie inmeng met gesonde mediese bestuur nie. “In die geval van ʼn veilige, doeltreffende inenting teen Covid-19 wat deur die Suid-Afrikaanse Reguleringsowerheid vir Gesondheidsprodukte (Sahpra) vir gebruik goedgekeur is, het medici sekere pligte soos bepaal deur die RGB.

“Dit sluit in om pasiënte as individue te respekteer en hul inherente waarde, waardigheid en gevoel van waarde te erken; om nie skade te doen of op te tree teen die beste belange van pasiënte of die samelewing nie, selfs as hierdie belange met hul eie bots; om die waarheid as die basis van vertroue in hul professionele verhoudings met pasiënte te beskou; en om daarna te streef om ʼn positiewe bydrae tot die samelewing te lewer in ooreenstemming met hul professionele vermoëns en sosiale posisie.”

Sama het verder daarop gewys dat dit ʼn oortreding is om met opset skadelike, onakkurate en vals inligting oor Covid-19-entstowwe te versprei wat tot voorkombare sterftes kan lei. “Ingevolge die Wet op Rampbestuur begaan ʼn persoon wat enige verklaring deur middel van enige medium, insluitend sosiale media, publiseer met die doel om enige ander persoon te mislei oor Covid-19 ʼn misdryf en is dit ná skuldigbevinding strafbaar met ʼn boete of gevangenisstraf van hoogstens ses maande, of beide die boete en gevangenisstraf.”

Volgens Sama ondersteun hy Covid-19-entstowwe as noodsaaklik en onderskryf hy die belangrikheid van wetenskaplike integriteit, deursigtigheid en vertroue van die publiek in Covid-19-entstowwe.

“Medici het ʼn etiese plig, soos uiteengesit in die eed wat hulle afgelê het, om die gesondheid en welstand van hul pasiënte te prioritiseer; om hul beroep met gewete en waardigheid te beoefen in ooreenstemming met internasionale standaarde vir beste praktyk en om die mensdom te dien.

“Sama sal nie sy lede ondersteun wat verkeerde inligting oor Covid-19-entstowwe versprei nie. Sama keur nie onetiese en onwettige gedrag deur sy lede goed nie en doen ʼn beroep op die RGB om medici te dissiplineer wat hul etiese pligte oortree deur die verspreiding van verkeerde inligting oor Covid-19-entstowwe.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

161 Kommentare

jongste oudste gewildste
Pieter

Wie bepaal wat is vals nuus? Dr Vosloo het raak punte, veral dat hartprobleme ontstaan na inspuitings en die Neurenbergkode wat vertrap word.

Johan

Gaan hulle dit konsekwent doen wanneer dit duidelik word dat die entstof nie die ‘Knight in shining armour’ is soos wat dit tans voorgehou word om te wees nie? Dan kan die dokters wat die entstof as “die enigste oplossing” ook maar aangetree word.

Nie Verbaas

En kan SAMA ongetwyfeld die teenoorgestelde bewys?

Alida

My suster se huisdr aan die Wesrand was ook een wat anti die entstof was en haar pasiënte afgeraai het om entstof te kry, my sus ingesluit. Baie van selfde argumente gebruik as dr Vosloo, die kinderdokter. My sus se dr het dus ook nie die J&J inspuiting gekry nie, en sy is begin Julie oorlede aan covid. Sy was maar in haar vroë 50s. Baie van haar pasiënte, sus ingesluit, het toe tot ander insigte gekom en vir spuit geregistreer.

Deon

Sy is reg op ten minste een punt, die golwe word voorspel met tye wanneer dit gaan kom daaraan gekoppel.