Pandor kap terug oor Bushiri-ontsnapping

Naledi Pandor, minister van internasionale betrekkinge. (Foto: @DIRCO_ZA/Twitter)

Die minister van internasionale betrekkinge en samewerking (Dirco), Naledi Pandor, ontken bewerings in ’n Sondagkoerant dat haar departement betrokke was by ’n komplot om die selfverklaarde profeet Shepherd Bushiri en sy vrou, Mary, uit Suid-Afrika te smokkel.

The Sunday Independent het die afgelope naweek berig diplomatieke paspoorte onder skuilname is vir die Bushiri-egpaar uitgereik. Hul gesigte is glo ook vermom voordat hulle op die Malawiese pres. Lazarus Chakwera se straler landuit is – ’n bewering wat die regering reeds telkens ontken het.

Luidens die berig was senior Malawiese en Suid-Afrikaanse politici en regeringsamptenare in ruil vir vergoeding by die ontsnappingskomplot betrokke.

Die Bushiri-egpaar (Foto: ANA)

Pandor het nou teruggekap na die opspraakwekkende bewerings.

“Minister Pandor is van mening dat hierdie aangeleentheid onderworpe moet wees aan ’n volledige en behoorlike ondersoek deur die verantwoordelike owerhede, eerder as bespiegeling wat grens aan onverantwoordelike joernalistiek,” sê Clayson Monyela, woordvoerder van Dirco.

Monyela sê verder dit is kommerwekkend dat Dirco nie die geleentheid gebied is om op die ernstige aantygings in die berig te reageer nie.

Pandor versoek nou dat die koerant die betrokke berig terugtrek en beoog om ʼn regsmening daaroor in te win.

Die Bushiri’s is tans weer op vrye voet nadat hulle verlede week in Malawi uit aanhouding vrygelaat is. Hulle is daar in hegtenis geneem nadat hulle ten spyte van hul streng borgtogvoorwaardes steeds uit Suid-Afrika kon vlug.

Die egpaar staan tereg op aanklagte van diefstal, geldwassery en bedrog in verband met ʼn beleggingskema in Suid-Afrika.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
JohanR

Wie in SA glo enigeiets wat ‘n ANC se…..sigarette sal weer verkoop word….sigarette sal NIE weer verkoop word….ja baas!

Persheks Adri

O nee die 1 ontken net so vinnig soos Cyril. Waar daar ‘n rokie trek brand ‘n vuurtjie ne!

Dries

Nou kan die profeet en profetes nie nou maar vir almal vertel presies hoe hulle oor die SA grens gekom het nie?

Pieter

Julle ANC is om van op te gooi VOETSEK

Misky

Jy klink nes my broer Jack minister Pandor