Die burgerregteorganisasie AfriForum se plaaslike tak in Parys in die Vrystaat het Vrydag die swak gehalte van die dorp se drinkwater by die departement van gesondheid en die Nasionale Instituut vir Oordraagbare Siektes (Nios) aangemeld.
Die departement en Nios word gevra om in te gryp voordat ernstige siektes onder inwoners uitbreek of, nog erger, ’n inwoner weens die swak gehalte van die water sterf.
Alta Pretorius, distrikskoördineerder vir die Mooirivier, sê die Ngwathe- plaaslike munisipaliteit, wat onder meer Parys en Vredefort bedien, is sedert September herhaaldelik aangemaan oor die bakterie E. coli, wat in rioolwater voorkom, wat in Parys se drinkwater aangetref is.
“Benewens die feit dat die water ongeskik vir menslike gebruik is, is daar ook dele van Parys waar die mense vyf jaar laas water in hul krane gehad het. Die watersuiweringswerke is glad nie op standaard nie, ten spyte van die ooreenkoms wat met AfriForum onderteken is waarin die munisipaliteit ’n deeglike evaluering van die watersuiwering- asook die rioolwerke gegee is met stappe wat hulle moet doen om dit te verbeter.”
Maroela Media het vroeër berig ʼn telling van tussen 46 en 60 van E. coli per 100 ml water in die plaaslike watersuiweringswerke se watertenker is enkele maande gelede aangetref. ʼn Telling van tussen 29 en 31 per 100 ml water is ook toe by ʼn inwoner se huis aangetref.
Volgens die Wêreldgesondheidsorganisasie (WGO) word ʼn nultelling van E. coli per 100 ml water as veilig beskou om te drink. ʼn Telling van tussen 11 en 100 per 100 ml water hou ʼn matige risiko vir mense se gesondheid in. Die risiko raak egter groter as dit oor ʼn lang tydperk ingeneem word.
“Die munisipaliteit begryp duidelik ook nie die erns van die situasie nie, want daar word nie daadwerklike pogings aangewend om die toestand om te draai nie,” sê Pretorius.
“Hierdie waterkrisis in Parys is ’n sprekende voorbeeld van ’n munisipaliteit wat glad nie oor die welstand van hulle inwoners besorg is nie.”
Die munisipaliteit is in September op terme geplaas oor die gehalte van sy drinkwater nadat resultate van laboratoriumtoetse toe reeds die bakterie E. coli in die drinkwater aangetref het.
In n plek soos Orania hoef jy nie oor die soort goed te bekommer nie
Nog nie
Dit is onaanvaarbaar! En menses gaan weer vir ANC stem.
Die munisipale bestuurder hoort in die tronk te wees
Dit gaan so sleg by die gevangenis, indien die munisipale bestuurder betrokke raak verkoop hul dalk die tronk ook om ‘n geldjie te maak !
Was die naweek in Parys. As dit nie die krag is nie dan is dit die water. Voel bitter jammer vir die mense
Ja nee so gaan alles ten gronde, hulle lag hul seker dood oor sulke dinge ! Hoeveel mense het nie daar gaan aftree nie en nou sit hul met boggerall!