‘Plattelandse dorpies kan verarm’

Foto: GCIS

Argieffoto: GCIS

AfriForum het Eskom en die regering Dinsdag gewaarsku dat die nagevolge van die Noord-Gautengse hoë hof se beslissing, dat sekere munisipaliteite se kragtoevoer afgesny mag word, die wankelende ekonomieë van dié plattelandse dorpies gaan verarm.

Die burgerregte-organisasie gaan ook ʼn aansoek aan die Nasionale Energiereguleerder van Suid-Afrika (NERSA) rig om die elektrisiteitsverskaffingslisensies van die betrokke munisipaliteite, wat nie aan die lisensievereistes voldoen nie, terug te trek.

Volgens Stefan Pieterse, AfriSake se woordvoerder, is die hofuitspraak slegte nuus vir klein dorpies se ekonomieë omdat die verkoop van elektrisiteit een van die hoofbronne van munisipale inkomste is. Elektrisiteit is uiteraard ook noodsaaklik vir dorpe se vervaardigingsektore.

“Munisipaliteite gaan minder inkomste genereer omdat besighede hul kragvoorsiening gaan privatiseer of verskuif na die metropole. Uiteindelik word gewone mense, nie die ondernemings nie, vir die wolwe gegooi,” het Pieterse gesê.

Dawie Roodt, hoofekonoom van die Efficient Group, meen die meeste groot maatskappye kry reeds hul krag direk van Eskom en sal nie so erg benadeel word nie. Roodt het gesê kleiner ondernemings sal in die toekoms op alternatiewe metodes van energieopwekking, soos kragopwekkers, moet staatmaak as Eskom die kragtoevoer afsny.

Volgens Marcus Pawson, hoof van plaaslike regering en omgewingsake by AfriForum, moet elke munisipaliteit ʼn volledige geïntegreerde ontwikkelingsplan (GOP) hê. Dit behels onder meer ʼn finansiële en ekonomiese ontwikkelingsplan. Hierdie dokumente, indien dit korrek geïmplementeer word, kan ʼn kardinale rol speel om die afsny van elektrisiteit strategies te verhoed en die ekonomiese uitwerking daarvan te vermy.

Pawson het verder gesê kleiner munisipaliteite het nie noodwendig kundiges wat ʼn behoorlike GOP kan opstel nie. Sonder hierdie ekonomiese en finansiële ontwikkelingsbeplanning, of met verouderde GOP’s, gaan agterstallige munisipaliteite nie in staat wees om Eskom te betaal nie. Kragonderbrekings gaan klein- en medium ondernemings se lewensvatbaarheid ondermyn en ekonomiese groei verhinder. Dit het die potensiaal om Suid-Afrika se plattelandse dorpies ekonomies te vernietig en mense se welvaart in hierdie gebiede uit te wis.

“AfriForum het die swak en ondeurdagte GOP’s van baie munisipaliteite gesien en ons kan tereg bekommerd wees oor die nagevolge van Eskom se kragbesnoeiings op ondernemings, mediese dienste en ander belangrike sektore,” het Pawson gesê.

“Eskom kan geensins daarop roem dat die bevel in sy guns beslis is nie. Suid-Afrika is in ʼn ekonomiese wurggreep, waar die enigste oplossing nou in die politici se hande lê met betrekking tot baie gemeenskappe se kultuur van wanbetaling, die swak administrasie van munisipaliteite, korrupsievlakke binne elke regeringsfeer en die skuldvlakke van staatsentiteite,” voer Pawson verder aan.

AfriForum beplan projekte vir intensiewe deelname aan munisipale beplanning en die bekamping van korrupsie binne elke regeringsfeer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Hendrik

munisipaliteite funsioneer onder die regering sowel as eskom. in werklikheid betasl die regering homself nie. wat gaan die regering nou doen om hul eie sake in die verband reg te stel. ek dink hulle weet self ook nie.

Ansie

Is daar al n lys van dorpe wat in die gevaar is van die krag wat afgesny gaan word.

Lance

Dit is anc beheerde rade …kannie geld invorder nie en dit wat ingevorder word , word wanbestee of gesteel ….presies wat die mense voor gestem het …so sny af dat hulle net kan wakkerskrik !

sharon

Hulle moet miskien begin waar die oorsaak vd probleem is… Dank bietjie mense af by die munisipaliteite want daar is hoeveel mense wat “spookposte” vul en salarisse trek. Daars mense wat miskien produktief 2 of 3ure per dag werk en die res vd tyd gesels gesels die dag omkry of met ‘n leë tafel sit en besig lyk. Die salarisse is over rated en die bonusse op posvlakke nog meer belaglik… Dit terwyl almal weet hulle verdien nie daardie verhogings of bonusse nie. Om dit volgens verdienste te betaal gaan ook nie werk nie… Want die performance reports gaan onwaar… Lees meer »

Jan Jooste

Ek hoop van harte dat Afriforum voortgaan met die hoofaansoek in Maart, veral om uit te wys hoe power die Fabricius uitspraak was. Ek wonder of dit enigsins moontlik is om die agterstallige skuld te vereffen, gegewe kontantvloei in die kleiner munisipaliteite. Eskom behoort in billikheid dieselfde afskrywings toestaan aan almal as wat reeds in Soweto toegestaan is. Kan ons hooggeregshof van Noord Gauteng dalk skuif na een van ons kraglose dorpe? Ek sien graag hoe slim is ‘n regter in praktyk. Voorspoed.