Twee polisiebeamptes van die Wes-Kaap sal Vrydag vir die dood van twee beweerde motordiewe in die Athlone-landdroshof verskyn. Dit kom nadat ʼn skietery verlede jaar tussen die polisie en die insittendes van ʼn vermoedelik gesteelde voertuig uitgebreek het.
Die twee polisiebeamptes is Donderdag deur die Onafhanklike Polisieondersoekdirektoraat (Opod) in hegtenis geneem. Hulle is onderskeidelik by die Kleinvlei- en Mfuleni‑polisiestasies werksaam.
Volgens Lizzy Suping, Opod-woordvoerder, word beweer dat die polisiebeamptes in April verlede jaar ʼn gesteelde voertuig agternagesit het, toe ʼn skietery tussen die insittendes en die polisie uitgebreek het. Die insittendes is in die proses doodgeskiet. Hulle was glo eerste om skote op die polisie af te vuur, waarna die polisie teruggeskiet het. Die insittendes is op die toneel dood verklaar.
Nadoodse ondersoeke het bevestig dat die slagoffers aan skietwonde beswyk het.