Prokureur sê oor moordenaar voor hy sterf

Sam Ntsoko. Foto: http://www.hsr.co.za

Die prokureur wat Woensdagoggend voor sy werksplek in Pretoria-Noord doodgeskiet is, het glo aan ʼn veiligheidswag gesê wie hom geskiet het oomblikke voor hy gesterf het.

Sam Ntsoko (46) is voor 07:00 voor die Hack, Stupel & Ross-prokureursfirma in Emily Hobhouse-straat doodgeskiet. Maroela Media het vroeër berig Ntsoko het by die perseel ingery toe ʼn man vermoedelik oor die muur gespring en langs sy voertuig verskyn het. Hy het Ntsoko meer as een keer deur sy voertuig se ruit geskiet voordat hy op die vlug geslaan het. Niks is tydens die voorval gesteel nie.

Twee verdagtes is Woensdagmiddag in Atteridgeville in hegtenis geneem. Kapt. Kay Makhubela, woordvoerder van die polisie, het gesê daar is ook op die vuurwapen en ʼn VW Golf beslag gelê wat vermoedelik tydens die aanval gebruik is.

Herman Smalberger, ʼn senior vennoot by Hack, Stupel & Ross, het aan Maroela Media gesê Frans Bapela, die veiligheidswag by die firma, het vanuit elders op die perseel die skote gehoor en nader gehardloop. Volgens Bapela het Ntsoko uit die motor geklim en gesê: “Sê vir die polisie dit was Nico”, voordat hy inmekaargesak het.

Smalberger het gesê hy weet nie wat die motief vir Ntsoko se moord was nie, maar hy glo dit was nie roof nie.

Hy het gesê Ntsoko het sedert 2000 by die firma gewerk en was sedert 2005 ʼn vennoot. “Sam se familie was vanoggend by die kantoor en ons het gereël dat hulle berading ontvang. Al die personeel het ook berading ontvang voordat hulle huis toe gestuur is,” het hy gesê. Hy het gesê die kantoor was vandag uit eerbetoon vir Ntsoko gesluit.

Volgens Smalberger was Ntsoko die pa van drie minderjarige kinders. Geen begrafnisreëlings is nog bekendgemaak nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Linda

Hoe haat ek hierdie land. Niemand maar niemand is veilig nie.

Nog 'n eerlike landsburger

Daar gaan nog ‘n eerlike landsburger, vader van kinders vir wie hy sorg, maar nee dit pla nie vir Zuma.

Elize

Ai dis hartseer, Cheryl Naude en personeel ek dink aan julle. Baie sterkte

Alida

Bly die moordenaar/s is gevang. Dit is tragies.

JR

Mag God die familie en vriende dra deur die tyd.
Misdaad in Pretoria Noord is oorweldigend. Smokkelaars staan saans sommer oop en bloot op straathoeke. Prostitute oraloor bedags.
Deur gebed sal ons hul uitdryf.