Pta-ma, seun (11) sterf ná slapende motoris hulle tref

Hendro De Beer. Foto: Facebook

Hendro De Beer. Foto: Facebook

ʼn Gesin van Pretoria is in rou gedompel nadat ʼn 11-jarige seun en sy ma Saterdag dood is toe ʼn bestuurder beheer oor sy bakkie verloor en hulle getref het waar hulle langs die pad gestaan het.

Martin De Beer het Dinsdag aan Maroela Media vertel hoe vinnig die grusame ongeluk gebeur het wat sy jongste, Hendro en sy vrou, Petro (43), se lewens geëis het.

“Ons was op pad terug van ʼn familielid se plaas en was in daardie stadium daar in die omgewing van Beetgekraal [in Mpumalanga], tussen Burgersfort en Lydenburg. Hendro het saam met my skoonma agter in die motor gesit toe hy begin karsiek voel. Ek het van die pad afgetrek, heeltemal van die teer af op die grond langsaan, sodat hy kon uitklim,” het Martin gesê.

“Hendro het omgeloop na waar Petro voor in die passasiersitplek gesit het en sy het solank uitgeklim sodat hy kon voor sit. Die volgende oomblik het ʼn Nissan Navara-bakkie van die pad af gery gekom, aan die linkerkant van ons motor verby en Hendro en Petro reg van voor getref.” Hendro is met die slag in die lug geslinger, terwyl Petro hard teen die motor se deur, wat heeltemal vorentoe omgebuig het, vasgeslaan is.

Petro De Beer. Foto: Facebook

Petro De Beer. Foto: Facebook

“Ek het dadelik uitgespring en Petro langs die motor sien lê, maar kon nie vir Hendro sien nie. Petro was by haar bewussyn en het dadelik gevra of Hendro oukei is.” Martin het na Hendro gesoek en hom ongeveer 20 meter verder gekry. “Hy was klaar blou in sy gesig. Ek kon onmiddellik sien hy is op slag dood,” het ʼn emosionele Martin gesê. “Ek het teruggestap na my vrou toe en vir haar gesê, ‘Ons kind is weg’.”

ʼn Helikopter het kort daarna met Petro na Life Midmed-hospitaal in Middelburg gevlieg, waar x-strale getoon het dat sy haar gewrig en been gebreek het. Haar heup was ook beseer en sy het ʼn groot sny aan haar kop gehad.

Petro is Sondagoggend geopereer en toe sy uit die teatersaal kom, het die dokters aan Martin gesê dat sy sukkel om asem te haal. “Hulle het vir my gesê om net ʼn draai te gaan stap en 15 minute later het hulle vir my kom sê haar longe het platgeval en sy is dood,” het hy hartseer gesê.

Volgens Martin is hy nie kwaad vir die bakkiebestuurder nie, omdat hy weet dat hy dit nie met opset gedoen het nie. “Die oomblik toe die bakkie tot stilstand kom, het hy uitgespring en gesê hy het aan die slaap geraak. Hy het pas ʼn 14 ure-skof klaar gewerk en wou ook maar net brood op sy familie se tafel sit. Dit was nie sy skuld nie – dit was ʼn ongeluk,” het Martin gesê.

Hy het gesê die polisie ondersoek ʼn saak van strafbare manslag.

“Ek sal Hendro onthou vir die liefdevolle en sprankelende kind wat hy was. Hy was uitgesproke en ʼn gebore leier wat altyd die voortou in ʼn situasie geneem het. Hendro was nogal baie soos Petro. Sy was ʼn regte mamma-hen wat net altyd wou seker maak dat almal om haar oukei is. Sy was ʼn wonderlike ma en vrou.”

Laerskool Totiusdal, waar Hendro in graad 6 was, het ook Dinsdag ʼn huldeblyk aan hom op Facebook gedeel en gesê sy vrolike en ondeunde gesiggie sal altyd onthou word.

ʼn Gesamentlike roudiens sal Vrydag vir Hendro en Petro in Waverley, Pretoria, gehou word. Albei sal veras word.

Die egpaar het ook ʼn ouer seun, Cornel (21).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
Gloudie

Ai Marine. Sê vir die pa ek is baie jammer en al my meegevoel.

Mariska

Dit is ‘n baie mooi gebaar van jou Martin om die man nie kwaalik te neem nie. Iets wat ek kan leer. Ons bid saam met jou vir sterkte en dat die Here sy arms om jou slaan.

Ilze

Hy was so oulike kind. Martin en Cornel baie sterkte vir julle in die tyd

Gerhard

Sterkte Martin vir jou & jou seun! Dis ‘n verskriklik ding wat met julle gebeur het, ek bid vir julle vir krag & dat ons Liewe Heer julle in sy arms vas sal hou, tot die seer beter is.

shirley

Hendro Petro Rus sag julle is nou in julle Hemel huis Martin en al hulle geliefdes my meegevoel vir julle ek bid ons skepper hou julle styf vas en gee julle die vertroosting wat net ons skepper kan gee