Ramaphosa: Aandklokreël, alkoholverkope aangepas

Pres. Cyril Ramaphosa (5 Augustus 2021) (Foto: Elmond Jiyane/GCIS)

Pres. Cyril Ramaphosa het Sondagaand die land toegespreek oor afsonderingsregulasies om die verspreiding van Covid-19 te bekamp.

Hy het gesê syfers van hospitale wys die waarde van inenting en het dit benadruk dat die inentings veilig, doeltreffend en die beste manier is om Covid-19 te bekamp. “Ons weet dat mense wat ingeënt is nog steeds die virus kan opdoen en dit na ander kan oordra. Ons sien egter dat mense wat ingeënt is, oor die algemeen nie ernstig siek word of suurstof benodig nie en dit is minder waarskynlik dat hulle sal sterf.”

Ramaphosa het gesê die derde golf van die pandemie is beslis nog nie verby nie, maar daar is die afgelope paar weke ʼn bestendige afname in gevalle landswyd.

Die president was met die nasionale koronavirusbevelraad en die ministeriële raadgewende komitee in gesprek en die besluit is geneem om die land van 13 September 2021 van vlak 3 van die afsonderingsregulasies af te skuif na vlak 2.

Dit beteken:

  • Die aandklokreël geld van 23:00 tot 04:00
  • Nie-noodsaaklike instellings (bv. restaurante, kroeë, ens.) moet reeds om 22:00 sluit
  • Byeenkomste (godsdienstige of politieke byeenkomste en sosiale geleenthede) word beperk tot 250 mense binnenshuis en 500 mense vir buitelug-geleenthede of 50% van die kapasiteit van die venue
  • Alkoholverkope vir verbruik weg van die perseel word toegelaat Maandag tot Vrydag, vanaf 10:00 – 18:00
  • Alkoholverkope vir verbruik op die perseel word toegelaat kragtens lisensiëringsreëls tot 22:00
  • Die dra van maskers bly verpligtend

Hierdie regulasies sal binne twee weke hersien word om die impak daarvan op Covid-19-gevalle landswyd te bepaal.

Ramaphosa het gesê daar sal ook binnekort meer inligting bekendgemaak word oor die regering se benadering tot inentingsertifikate.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
Mariaan

Ironies…ons wag vir “die president” om te se dis reg om funksies v 250 binneshuis by te woon…NEVER sal ek n funksie bywoon met soveel mense nie…COVID is nog BAIE aktief…mense moet hul gesonde verstand gebruik en hulself beskerm

Tiptol

Darem bietjie goeie nuus. As ons net ‘n hoër inenting syfer kan kry, kan al die reëls opgeskort word soos die UK.

annie

Sal ons ooit ontsnap uit die web van die bevelsraad wat nou so ingewurm is in die bestel dat hul glo hulle is die regering met haar hoogheid die regeerder? Daai entstoffabrieke begin ook nou eers botteltjies uitryg…

Bokkiebek

Dis vir my moeilik om te verstaan dat sosiale byeenkomste – troues en partytjies tot 250 mense binne mag vergader en self as jy Sondag kerk toe gaan en 500 as dit opelug is – maar ‘n begrafnis mag net 50 mense bywoon….jy moet ‘n uitnodiging rig aan wie mag en wie mag nie..baie sad. Weereens maak hulle reels nie sin nie..

Persheks Adri

Betogers mag seker wéér in massas wees. Nie dat hulle die reëls nakom nie in elk geval!