Ramaphosa ondersteun Die Stem in die volkslied

Pres. Cyril Ramaphosa (Foto: Elmond Jiyane/GCIS)

Pres. Cyril Ramaphosa het Donderdagmiddag in die parlement sy steun uitgespreek vir die behoud van die deel uit Die Stem in die nasionale volkslied.

Hy het geantwoord op ‘n opvolgvraag oor nasionale versoening deur die EFF-LP, Reneilwe Mashabela, wat wil hê die deel uit Die Stem moet uit die nasionale volkslied verdwyn.

Ramaphosa het nie met haar saamgestem nie en het aangevoer die saamgestelde volkslied is een van die aspekte wat alle Suid-Afrikaners maak wat hulle is. “Ek dink ons volkslied in vier tale verteenwoordig en verenig ons. Soos wat party mense moet ophou om Die Stem teen te werk, moet ander hul Vierkleure wegpak,” aldus Ramaphosa.

In ‘n hoogs onverwagse wending het die EFF-leier, Julius Malema, gesê sy party het geen probleem met Afrikaans as taal nie en sing graag in Afrikaans, maar hul beswaar is teen Die Stem as apartheidsimbool. “Die Stem moet weg,” het Malema in aksentlose Afrikaans gesê.

Die aanvanklike vraag oor versoening is gevra deur die VF Plus-hoofsweep, dr. Corne Mulder, wat dit gehad het daaroor dat minderhede vervreemd voel en dat die VF Plus daaroor met die president wil onderhandel. Ramaphosa het homself bereid verklaar tot “kampvuurgesprekke” met die VF Plus.

Vroeër in die presidensiële vraag- en antwoordsessie het die vonke gespat toe die DA-leier, Mmusi Maimane, vir Ramaphosa gevra het oor die voorstel om pensioengeld te gebruik vir Eskom-skuld. Die DA beveg dit. Ramaphosa het gesê dit moet oorweeg word. In ‘n belangrike wending het dr. Mbuyiseni Ndlozi die EFF vereenselwig met die DA se teenstand teen die plan.

Dieselfde het gebeur toe Ramaphosa vrae beantwoord het oor die omstrede te stigte nasionale gesondheidsversekering. Die DA, die IVP en die VF Plus het hul teenstand teen die plan sterk benadruk. Toe gee die EFF se adjunk-hoofsweep, Hlengiwe Mkhaliphi, die sterkste aanduiding tot dusver dat die EFF ook teen die plan in sy huidige vorm is (die EFF-LP dr. Suzan Thembakhwayo het ook al in daardie rigting gepraat) deur te sê Ramaphosa moet eers daarop fokus om die huidige staatsgedrewe gesondheidstelsel reg te ruk voordat nasionale gesondheidsversekering aangepak word.

Ramaphosa het geantwoord dat die nasionale gesondheidsversekering wel nodig is, maar dat die regering die ene ore is oor moontlike implementeringswyses.

Die IVP se Mkhuleko Hlengwa het gevra oor grondhervorming, en oor gebrekkige openbare deelname rakende die toekoms van die stamgrond wat val onder die Ingonyama-trust in KwaZulu-Natal. Ramaphosa het bevestig dat koning Goodwill Zwelethini van die Zoeloes ‘n brief aan hom geskryf het oor die onderwerp en dat ‘n hele string kabinetsministers met die koning daaroor gaan onderhandel.

Namens die DA het Maimane uitgewys dat die konstitusionele hof hierdie week nogmaals bevind het dit is die regering se onbekwaamheid wat grondhervorming terughou. Ramaphosa het die punt toegegee en gesê die regering sal in die toekoms beter vaar.

Tammy Breedt van die VF Plus het gevra of die kabinet ook die minderheidsverslag deur Dan Kriek en Nick Serfontein van die presidensiële taakgroep oor grondhervorming sal oorweeg, bykomend tot die meerderheidsverslag, en Ramaphosa het die versekering gegee dat hulle dit sal doen.

In die vierde verrassende EFF-wending van die dag het Malema aangedui dat sy party nie tradisionele (oorgeërfde) leierskap as demokraties houdbaar sien nie.

Maimane het namens die DA gevra of Ramaphosa ‘n kommissie van ondersoek sal aanstel na skenkings aan die CR17-veldtog wat tot sy verkiesing as ANC-leier gelei het. Die president het gesê hy sal wag vir die hofuitspraak in daardie verband.

Malema het namens die EFF gevra wat Ramaphosa se probleem is daarmee om sy skenkers te identifiseer en die president het gesê hy sal dit net doen as almal dit doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Natan

Wat is nou fout met die Vierkleur, waar kom dit in? Die Transvaalse Vierkleur verwys na my stamland en die vlag het gepronk op Amajuba. Ramaphose se Engelse geldskieters haat seker die vlag.

EN wat van die Venda vierkleurvlag met sy kenmerkende V, toe Venda deel was van die TBVC lande tydens Apartheid. Amper elke Venda-voertuig in Pretoria ry met die vlag op sy agterkant rond. Die kan maar bly? Selektief. Rassehaat.

Jacques

Jy is of vir iets, of teen iets.
Tot dusver was julle nog almal teen Afrikaans.
Vergeet maar die verkleurmannetjiespel.
Ons val nie daarvoor nie.
Die Stem (in die volkslied) moet val.

JohanR

En wat! Moet ons nou almal baie dankbaar wees?

Ander Koos

Die wortel en die stok

Me too

Ek stem 100% saam met C R die stem moet bly, maar ek wil baie graag n voorstel maak. Ek is n groot voorstander van eenheid,, soos die reĕnboognasie ook genoem word, en daarom is my mening dat die volkslied moet herskrywe word, daar is 11 amptelike tale, Hoe kom net 4 gebruik? Kom ons laat waai,