‘n Boom het by die St George-katedraal in Kaapstad omgeval (Foto: Michael Weeder/Facebook)
Rampspanne is reg oor Kaapstad ontplooi ná reën grootskaalse skade aangerig het.
Anton Bredell, die Wes-Kaapse LUR van plaaslike regering, omgewingsake en ruimtelike beplanning, het tydens ʼn perskonferensie gesê minstens 133 mm reën is die afgelope 12 tot 24 uur in Stellenbosch aangeteken.
ʼn Maroela-leser se weerstasie in Vredehoek, in Kaapstad se middestad, het oornag tussen Sondagaand en Maandagoggend om 08:30 reeds 294,6 mm reën aangeteken.
“Oorstroomde paaie is die grootste probleem wat ondervind word vir inwoners wat ná die langnaweek wil terugkeer,” het Bredell bygevoeg. “Motoriste word versoek om ag te slaan op enige padtekens van paaie wat gesluit is.”
Volgens hom is 11 mense in die Stanford-gebied gered en sewe gesinne in Grabouw. Die Nasionale Seereddingsinstituut het ook drie mense op ʼn boot gered.
Bredell sê Hermanus is steeds sonder kragtoevoer.
Die Breedevallei is ook swaar getref deur die storm.
Die Botrivierbrug het weggespoel. Een motor was op die brug en is in die vloedwater meegesleur. “Een persoon is gered, maar ʼn tweede persoon wat in die motor was, word nog vermis,” het Bredell bygevoeg.
“In Villiersdorp word twee persone vermis. Reddingspanne is steeds na hulle op soek. Ongeveer 250 gesinne is ontruim.”
Drie mense is dood toe ʼn Golden Arrow-bus op Jakes Gerwelrylaan naby Athlone omgeslaan het.
Bredell sê die opruimingswerk duur voort en almal doen hul bes om bystand te lewer waar nodig. “Die volgende 12 uur gaan moeilik wees,” het hy gesê.
Alan Winde, premier van die Wes-Kaap, het inwoners versoek om die provinsiale nooddienste te kontak by 0860 142 142. “Ons het ekstra personeel ontplooi om dié noodlyn te beman.”
Motoriste word versoek om hul reisplanne so ver as moontlik uit te stel.
Die N1 tussen Worcester en Touwsrivier is intussen ook gesluit. Alle reisigers sal via Ceres moet ry om dié gebied te vermy.
Padgebruikers op die N2 wat in die rigting van Kaapstad reis, word by Swellendam na die R62 by Ashton via die R60 herlei, en sal van daar via die N1 en Hugenote-tonnel na Kaapstad reis.
Klik hier vir ‘n volledige lys van padsluitings.
- ‘n Groot eikeboom het voor St George-katedraal in Kaapstad omgeval:
- Grootskaalse skade is aangerig by Monkey Town:
- Alle paaie na Bredasdorp is gesluit:
#Flooding: N2 Inbound at Borcherds Quarry Ramp , Lane closure , drive carefully #AlwaysBuckleUp pic.twitter.com/Qg0b38tATW
— Cape Town FMS (@CapeTownFreeway) September 25, 2023
Congestion: N1 Inbound at the Toll Plaza. Expect delays. #AlwaysBuckleUp pic.twitter.com/gu7KMQwUbC
— Cape Town FMS (@CapeTownFreeway) September 25, 2023
Die N1 tussen De Doorns en Worcester is gesluit – hoekom herlei Provinsiale Verkeer nie net die hoofroete verkeer via die onder-Rabie pad, deur De Doorns (onderdorp) via Modderfontein/Orchard pad rigting Sandhills, vandaar weer op die N1 nie? Tensy dáár ook padversperrings/verspoelings is. Dis een hengse ompad vanaf die Touwsrivier/Ceres afdraai, oor Mitchell’s Pas, terug via die R46/R43 tot skuins voor Worcester.