Regering se R50 miljoen-skenking aan Kuba finaal gestuit

(Foto: Yamil LAGE/AFP)

Die burgerregteorganisasie AfriForum het die regering se beoogde skenking van R50 miljoen aan die Kubaanse regering suksesvol gestuit.

Dié uitspraak Woensdag deur die hooggeregshof in Pretoria volg nadat AfriForum op 15 Mei ’n hersieningsaansoek ingedien het om die onwettige skenking deur die departement van internasionale betrekkinge en samewerking te keer.

AfriForum het in 2022 ’n dringende interdik bekom om die departement te verhoed om die R50 miljoen aan die Kubaanse regering te skenk. Die appèlhof het Dinsdag die departement se appèlaansoek teen die interdik met koste van die hand gewys.

AfriForum het in sy hersieningsaansoek gevra dat die skenking tersyde gestel word, dat die besluit wat deur die Nasionale Tesourie geneem is om die skenking goed te keur tersyde gestel word, en dat die besluit om die geld te stuur nie toegelaat mag word nie – alles met regskoste.

Verder mag enige toekomstige skenking aan Kuba nie toegelaat word sonder parlementêre goedkeuring, soos uiteengesit in die organisasie se versoek nie.

“Die Suid-Afrikaanse regering is in ’n ernstige finansiële krisis en kan nie bekostig om so ’n buitensporige bedrag geld irrasioneel te skenk nie,” het Charné Mostert, veldtogbeampte by AfriForum, gesê. “Die onsekerheid oor die werklike bedrag van die skenking wys ook hoe belangrik dit is om hierdie belaglike skenking stop te sit.

“’n Land met ’n sukkelende ekonomie en ’n regering wie se geld op die punt is om op te raak, kan nie sommer net miljoene rande aan sy vriende uitdeel nie. Dit is verregaande om só ’n reusebedrag geld onder die huidige sosio-ekonomiese toestande aan ’n ander land te skenk.”

AfriForum het ook verlede week ’n aansoek ingevolge die Wet op die Bevordering van Toegang tot Inligting (Paia) by die departement ingedien, waarin omvattende rekords van alle skenkings wat die Suid-Afrikaanse regering oor die afgelope 20 jaar aan Kuba gedoen het, aangevra word.

Die aansoek is ingedien nadat dit aan die lig gekom het dat R120 miljoen deur die departement van verdediging vermors is nadat Suid-Afrikaanse studente teen groot koste vir mediese opleiding na Kuba gestuur is.

“AfriForum staan onwrikbaar teen die verregaande verkwisting van uitgawes deur die regering. As min. Naledi Pandor so desperaat is om Kuba te help, kan sy dit uit haar eie sak doen,” het Mostert gesê.

Pandor, minister van internasionale betrekkinge en samewerking, het in Mei verlede jaar gesê Suid-Afrika kan nie sy oë sluit vir die lot van Kuba terwyl hul ekonomie deur “onwettige blokkades en sanksies” gewurg word nie.

Pandor het tydens haar departement se begrotingsrede gesê Suid-Afrika is ook bereid en daartoe verbind om “in solidariteit met ons broers en susters in Kuba op te tree”.

“Die Kubaanse ekonomie is op sy knieë gedwing ná 61 jaar van drakoniese Amerikaanse ekonomiese sanksies wat op daardie verarmde eilandnasie ingestel is. Dít is ’n nasie wat skouer aan skouer saam met ons vegters gestaan het in die stryd om vryheid en ons moet help as ons kan.”