Die sentrale bank se monetêre beleidskomitee het eenparig besluit: Die rentekoers bly onveranderd.
Lesetja Kganyago, goewerneur van die Suid-Afrikaanse Reserwebank, het Woensdagmiddag bevestig die rentekoers bly vir ʼn vyfde agtereenvolgende keer op 8,25% – die hoogste vlak in 15 jaar.
Die prima uitleenkoers staan dus stil op 11,75%.
Ekonome was dié besluit van die monetêre beleidskomitee te wagte.
The South African Reserve Bank MPC decided to keep the repurchase rate at its current level of 8.25% per year. The decision was unanimous. #SARBMPCMAR2024 pic.twitter.com/gTPsUXQ5XC
— SA Reserve Bank (@SAReserveBank) March 27, 2024
Dit was vanmiddag duidelik dat die sentrale bank bekommerd is oor inflasie.
Kganyago het toegegee dat talle lande onder die druk van inflasie steier. Die goewerneur het egter daarop gewys dat Suid-Afrika ʼn meer geleidelike versnelling in inflasie as baie eweknielande gehad het, met ʼn laer piek, ná Covid-19.
“Die terugkeer na die teiken was stadig.”
Jaarlikse verbruikersinflasie het in Februarie tot 5,6%, van onderskeidelik 5,3% in Januarie en 5,1% in Desember, gestyg.
Dit is steeds binne die teikenband van 3% tot 6% hoewel nader aan die bopunt as die middelpunt.
Die jongste syfers is ook “nog ʼn vertraging in ons pad terug na ons 4,5%-doelwit”, het Kganyago verduidelik.
Die sentrale bank se monetêre beleidskomitee is wel vol moed dat inflasie vorentoe weer by 4,5% gaan draai, maar sê dit lyk in dié stadium of inflasie, “gegewe ekstra inflasiedruk”, eers teen die einde van 2025 die middelpunt van die teikenband gaan bereik.
“Dit is later as wat voorheen verwag is,” het Kganyago verduidelik.
Hy het verder gesê Suid-Afrika vorm deel van die wêreldwye neiging waar dienste eerder as goedere ʼn groot bron van inflasie geword het.
Om dit onveranderd te los doen ons nie goed wanneer gaan dit daal?
Vraag is of die lede hulle blind staar teen die werklikhede? Rentekoers moes al tydens vorige hersiening afwaarts aangepas gewees het