Kenneth Stephen.
Talle soek- en reddingspanne het Dinsdag tot laatmiddag nog op Tafelberg na enige teken van Kenneth Stephen gesoek nadat hy glo op die berg vermis geraak het.
Stephen (36) het glo Maandag omstreeks 14:30 gaan draf, maar nooit teruggekeer nie. Sy motor is laat Maandagaand in die pad in die omgewing van die Platteklip-ravyn gevind.
Volgens Johann Marais, woordvoerder van Wildernis-soek-en-redding (WSAR), is daar dadelik met ʼn soektog na Stephen begin.
“Die weerstoestande was nie gunstig nie en kort na middernag het sy familie laat weet dat dit blyk dat sy selfoon aan Clifton se kant van Leeukop is. ʼn Soektog in die omgewing het egter ook geen vrugte afgewerp nie.”
Die oorspronklike soektog is Dinsdagoggend vroeg afgelas, maar vyf spanne het kort daarna weer die soektog hervat.
ʼn Helikopter is ook ingespan en teen vroegmiddag was ʼn totaal van 16 soek- en reddingspanne op verskeie dele van Tafelberg ontplooi. Die spanne het egter teen 17:00 van die berg af begin beweeg en die soektog sal Woensdagoggend voortgesit word.
Die WSAR het enigiemand met inligting versoek om hulle te kontak by 021 937 0300.
Hoop en bid hy word ongeskonde gevind. Sterkte aan die familie in die vreeslike tyd