Richard Mdluli nie in hof weens swak gesondheid

Richard Mdluli. (Argieffoto)

Richard Mdluli, voormalige hoof van misdaadintelligensie by die polisie, het nié Dinsdag saam met sy medebeskuldigdes in die Pretoriase handelsmisdaadhof verskyn op aanklagte van bedrog, diefstal en korrupsie nie.

Dít weens swak gesondheid.

Mdluli dien tans vyf jaar tronkstraf uit nadat hy en Mthembeni Mthunzi vroeër skuldig bevind is op twee aanklagte van ontvoering, twee aanklagte van aanranding en twee aanklagte van ernstige aanranding.

Mdluli was egter veronderstel om vandag in ’n afsonderlike saak saam met Solomon Lazarus, voormalige finansiële hoof by die polisie se misdaadintelligensie-eenheid, en Heine Barnard, ʼn voormalige verkrygingsbestuurder, in die hof te verskyn.

Hulle word daarvan beskuldig dat hulle ’n geheime misdaadintelligensiefonds van die polisie geplunder het.

Sindisiwe Twala, ’n woordvoerder van die ondersoekdirektoraat van die Nasionale Vervolgingsgesag (NVG), sê Lazarus en Barnard het wel vandag vlugtig in die hof verskyn voordat die saak na die Pretoriase hooggeregshof oorgeplaas is.

Die saak sal nou na verwagting op 8 Februarie in dié hof aangehoor word.

Lazarus en Barnard het gedurende die verskyning aangedui dat hulle van plan is om aansoek te doen vir die staat om hul regskoste te betaal aangesien hulle nie regsverteenwoordiging vir die volle duur van die verhoor sal kan bekostig nie.

Twala sê die ondersoekdirektoraat is gereed vir die verhoor om te begin.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Blikkantien

Die media is mos baie lief vir aanhalingstekens. Waarom nie “swak gesondheid” nie?

Persheks Adri

Hoe gerieflik ne om skielik siek te wees! Nee ons gaan nie betaal nie klaar. Verdien jou geld en betaal self! Jy’t mooi geleer by kaders. Kamstig siek pffft ons glo jou ou

Anel

Wat se siekte het hy nou weer?

Willem

Zuma het hulle mooi geleer

Willem

Snaaks hoe vinnig hul siek word as hul moet hof toe