Gerhard Schutte is al die afgelope 35 jaar aan stuur van sake by die Rooivleisprodusenteorganisasie. (Foto: RPO)
Gerhard Schutte, ʼn man wat as ʼn steunpilaar in die landboubedryf bestempel word en al die afgelope 35 jaar aan stuur van die Rooivleisprodusenteorganisasie (RPO) is, lê die tuig neer.
Schutte tree in Januarie af, “die einde van ʼn era” wat “gekenmerk word deur sy onwrikbare toewyding en transformerende leiding”, sê die RPO in ʼn verklaring.
“Gedurende sy ampstermyn het Schutte merkbare bydraes gelewer tot die rooivleisbedryf, wat ʼn onuitwisbare indruk op die organisasie en die breër landbougemeenskap gelaat het.”
Die RPO sê as hoof van die organisasie het Schutte die uitdagings en geleenthede binne die rooivleisbedryf met vaardigheid hanteer.
“Hy was ʼn kampvegter vir die regte en belange van rooivleisprodusente en het gestreef na regverdige handelspraktyke, volhoubare boerderymetodes en verbeterde bedryfstandaarde. Onder sy leiding het die Rooivleisprodusenteorganisasie in statuur gegroei en ʼn gedugte stem binne die landbousektor geword.”
Die RPO sê Schutte se invloed strek selfs verder as dié organisasie.
Hy word wyd erken as ʼn invloedryke figuur in die landbougemeenskap te danke aan sy skryfwerk en aanbiedings. Deur die jare het hy talle artikels geskryf oor onderwerpe soos marktendense, beleidskwessies, tegnologiese vorderings en omgewingsvolhoubaarheid. Sy artikels dien as waardevolle hulpbronne vir bedryfslui, beleidmakers en boere.
“Daarbenewens het sy dinamiese aanbiedings hom na verskeie dele van Suid-Afrika geneem, waar hy sy insig en kennis gedeel en samewerking bevorder het.”
Die RPO het intussen reeds met die proses begin om ʼn opvolger vir Schutte te werf. “Die soektog sal fokus op die identifisering van iemand met ʼn diepgaande begrip van die rooivleisbedryf, uitsonderlike bestuursvaardighede en ʼn passie om die belange van rooivleisprodusente te bevorder.”
Schutte se merkwaardige loopbaan het nie net die RPO gevorm nie, maar ook ʼn blywende nalatenskap binne die landbougemeenskap gelaat, sê die organisasie.
“Sy aftrede sal ʼn tyd wees om sy groot bydraes te vier terwyl ons ook na die toekoms kyk en die nuwe geleenthede wat voorlê onder die leiding van ʼn nuwe uitvoerende hoof. Die RPO sal voortbou op die fondament wat Schutte gelê het, om die volhoubare groei en welvaart van die rooivleisbedryf in Suid-Afrika te verseker.”
Ek sou seker ook spreekwoordelik die “skip gespring” het voor die aanslag teen die rooivleis produsente van stapel gestuur word. Met die AI boerdery-toep wat nou in werking is sal hul al die data kan bekom om dit regulatories onmoontlik te maak om te kan boer. Sien die Gates Foundation het in Maart 2023 $15.3Mil aan Zoetis toegeken. Gates is besig met sy “Beyond Meat” en dan begin hy inmeng met dieregesondheid ook – baie verdag!
Ek vertou daai Gates net niks. Hy is baie bedrywig by die WEF en die Nuwe Wêreld Orde reëlings.