Die drieverdiepinghuis van die My Octopus Teacher-vervaardiger is erg beskadig. (Foto: Facebook / Cape Medical Response)
Die huis van die vervaardiger Craig Foster – bekend vir die Oscar-bekroonde dokumentêr My Octopus Teacher – is Donderdag in ’n brand in Murdoch Valley buite Kaapstad verwoes.
Nooddienswerkers van Cape Medical Response (CMR) en Kaapstad se brand-en‑reddingsdienste is omstreeks 10:00 na die huis in Freesiaweg in Simonstad ontbied.
“Brandspanne van Simonstad, Kommetjieweg en Vishoek is na die toneel ontbied. Die drieverdiepinghuis het grootskaalse skade opgedoen en die gebied moes afgebaken word,” het Jermaine Carelse, woordvoerder van die stad se brand-en‑reddingsdienste, gesê.
Die brand was teen 11:45 geblus, hoewel brandspanne die gebied steeds monitor aangesien daar baie hout in die omgewing is.
Volgens CMR is geen beserings aangemeld nie, en luidens plaaslike mediaberigte was Foster en sy vrou, die natuurbewaringsjoernalis en vervaardiger Swati Thiyagarajan, nie tydens die voorval by die huis nie.
The Daily Maverick berig dat lede van die gemeenskap kort na die brand in die rigting van Foster se huis gehardloop het in pogings om die eiendom met water uit tuinslange nat te maak om te verhoed dat die brand verder versprei.
Die oorsaak van die brand is onbekend en sal deel van ondersoeke uitmaak.
