Suid-Afrikaners is skynbaar van die ongelukkigste ter wêreld, met inwoners van sommige lande wat in oorlog gewikkel is selfs gelukkiger as inwoners aan die suidpunt van Afrika.
Dít volgens die mees onlangse data van die World Happiness Report, wat die afgelope week bekendgestel is. Dié indeks meet jaarliks die gelukskoers van 137 lande deur te kyk na faktore soos inwoners se persepsie van korrupsie, BBP per kapita en lewensverwagting. Lande word dan ʼn punt uit 10 toegeken.
Suid-Afrika is 85ste op die lys, met ʼn punt van 5,2. Dit is ʼn skamele 0,01 punte meer as die Republiek van die Kongo en 0,2 punte hoër as Oekraïne, wat tans in ʼn oorlog met Rusland gewikkel is. Rusland self is 70ste op die lys, met ʼn punt van 5,6. Suid-Afrika is ook laer op die ranglys as lande soos Algerië (81ste), Brasilië (49ste) en Meksiko (36ste).
Suid-Afrika se buurlande is almal laer af op die lys geplaas, met Zimbabwe in die 134ste plek (3,2 punte). Afghanistan is volgens die lys die ongelukkigste land ter wêreld, met ʼn punt van 1,8 uit 10.
Finland (7,8 punte), Denemarke (7,5) en Ysland (7,5) se inwoners is skynbaar van die gelukkigste ter wêreld. Dit is die derde jaar agtereenvolgens dat Finland eerste op die indeks geplaas word. Luidens die verslag is dieselfde lande deurlopend in die top 20. Dit sluit in Nieu-Seeland (10de), Australië (12de) en Amerika (15de). Inwoners van dié lande ervaar gewoonlik baie vryheid, min korrupsie en genoegsame maatskaplike ondersteuning.