Schweizer-onnie se stryd nog nie verby

Elana Barkhuizen. Foto: Verskaf

Elana Barkhuizen se skorsing is gister deur die arbeidshof in Johannesburg ter syde gestel, maar nou lê daar nog ʼn stryd vir haar voor.

Barkhuizen, ʼn onderwyseres aan die Laerskool Schweizer-Reneke, moet vandag voor die etiese komitee van die Suid-Afrikaanse Raad van Opvoeders (Sace) verskyn.

Volgens Dirk Hermann, bestuurshoof van Solidariteit, het Sace vir Barkhuizen en die vakbond kennis gegee dat hulle ʼn ondersoek van stapel gestuur het oor beweerde onprofessionele gedrag deur Barkhuizen.

“Ons is bekommerd dat die ondersoek eintlik net plaasvind weens openbare mening en die herrie wat rondom die hele ding losgebars het en deur politieke opportuniste veroorsaak is eerder as op grond van die meriete van die saak,” sê Hermann.

Barkhuizen het intussen by monde van Hermann gesê die jongste ondersoek is vir haar ʼn groot teleurstelling, want dit beteken sy kan ondanks die arbeidshofuitspraak nog nie terugkeer Schweizer-Reneke toe nie.

“Sy wil huis toe gaan. Sy moes hier wees om vir die hofsaak voor te berei, asook weens die onsekerheid in die dorp en vir haar eie veiligheid. Sy wil haar lewe bestendig en terug wees by haar kindertjies om vir hulle skool te gee,” sê Hermann.

Dr. Dirk Hermann, bestuurshoof van Solidariteit, en Elana Barkhuizen in die hof. Foto: Twitter via @solidariteit

Barkhuizen sal waarskynlik wanneer sy vandag voor die komitee verskyn talle vrae moet beantwoord en daar sal dan besluit word of daar enige verdere optrede gaan wees.

“Dit is hoogs uitsonderlik dat hulle dié soort ondersoek doen. As alle onderwysers op sulke swak meriete ondersoek moet word, sal hulle permanent besig wees met ondersoeke. ʼn Professionele liggaam is nie veronderstel om hom te bemoei met ʼn sogenaamde rasseherrie nie.”

Volgens Hermann is Barkhuizen al deur genoeg beproewing. “Sy is deur ʼn boendoehof skuldig bevind, maar deur ʼn geregshof onskuldig bevind. Daarom meen ons enige verdere ondersoeke, hetsy deur die raad, die skool of enigiemand anders, moet nou gestaak word.” Hermann het gesê Solidariteit sal na gelang van die uitslag van vandag se gebeure op verdere stappe besluit.

Solidariteit se dringende aansoek in die arbeidshof om Barkhuizen se skorsing met onmiddellike inwerkingtreding ter syde te stel is Donderdag aangehoor en regter Connie Prinsloo het beslis Barkhuizen se skorsing was onwettig.

Barkhuizen is geskors oor ʼn omstrede foto van ʼn gr. R-klas waarop wit en swart kinders apart sit. Die foto is nie in haar klas geneem nie, maar in haar kollega se klaskamer waar Barkhuizen vir ʼn wyle toesig gehou het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

77 Kommentare

jongste oudste gewildste
Linda

Ek hoop dat Barkhuizen n baie groot geldelike eis gaan bring teen die skuldiges vir skadevergoeding. Dis tyd dat mense begin opstaan in die land en sulke mense looi !!!

Hou so aan...

Hulle gaan aan en aanhou totdat iemand dit verloor….miskien is dit presies wat hulle wil he….n skool is mos die regte plek vir politiek.

Linda

Solidariteit het goeie werk hier gedoen, nou is dit hoigtyd dat Soludariteit skole se beheerliggame aanvat met n moontlikheid om dit heeltemal tot niet te verklaar by skole !!!

Anoniem

Rêrig, nou krap hulle waar dit nog nooit gejeuk het nie ! Nee kyk nou is dit belaglik !!! Kry dit nou agter JULLE Asb Asb

Linda

Julle gaan sien, in die toekoms gaan beheerliggame by skole nie meer beperk wees tot een ras nie, en nes iemand hier se, n goeie afset punt vir politiek !! Verbied beheerliggame by skole. In my kinders (3) se tyd het ons nie sulke goed gehad nie !!