Argieffoto (Foto: jplenio f/Pixabay)
Eskom het gesê weens die verlies van vyf groot kragopwekkingseenhede die afgelope 36 uur en die vertraging om vyf eenhede weer in diens te stel, sal beurtkrag fase 3 van 07:00 – 16:00 Sondag ingestel word.
Tussen 16:00 en 00:00 sal fase 4 beurtkrag toegepas word en dan verlaag word na fase 2-beurtkrag tot Maandag om 05:00. Eskom sal enige veranderinge aankondig indien nodig.
Drie eenhede by Kendal, en een elk by Tutuka en Majuba-kragstasies moes afgeskakel word vir noodherstelwerk. Die indiensstelling van een kragopwekkingseenheid elk by Medupi, Arnot, Camden, Kriel en Duvha word vertraag.
Fase 4-beurtkrag sal Maandag van 05:00 – 00:00 toegepas word. Fase 2-beurtkrag sal dan oornag van middernag tot Dinsdag om 05:00 ingestel word. Dié beurtkrag-fases sal waarskynlik deur die week herhaal word.
Die kragvoorsiener het tans 4 597 MW op beplande instandhouding en 16 457 MW van kapasiteit wat weens onvoorsiene omstandighede nie beskikbaar is nie.
Verbruikers word gemaan om elektrisiteit spaarsamig te verbruik.
