Stella-koshuismoorde: Name van slagoffers, verdagte bekend

Sharnelle Hough (17), links, en Marna Engelbrecht (16). Foto: Via Facebook

Die name van die tienermeisies wie se liggame Saterdagoggend in hul koshuis by die Hoërskool Stella gevind is en die jong man wat van hul moorde verdink word, is bekend gemaak.

Lt.kol. Amanda Funani, provinsiale polisiewoordvoerder, het die twee slagoffers as Sharnelle Hough (17) en Marna Engelbrecht (16) geïdentifiseer. Hul name moes weerhou word totdat die jong man wat weens hul moorde in hegtenis geneem is, Maandag in die hof verskyn het.

Die verdagte, Xander Bylsma (19), het Maandagoggend in die Vryburg-landdroshof verskyn op twee aanklagte van moord. Sharnelle en Marna was beste vriendinne. Xander was Sharnelle se voormalige kêrel.

Xander het vlugtig in die hof verskyn. Die saak is tot tot 6 Augustus uitgestel vir verdere ondersoek. Hy bly in aanhouding.

Xander Bylsma (19). Foto: Via Facebook

Maroela Media het vroeër berig die meisies, albei in gr. 11, was veronderstel om Saterdagoggend die skoolbus te haal om netbal op Koster te gaan kyk.

“Die koshuismoeder het na hulle gaan soek en die 17-jarige meisie [Sharnelle] aan die trapreling sien hang. Die polisie is ontbied en die 16-jarige meisie [Marna] se liggaam is in die badkamer aangetref. Sy is moontlik verwurg en daar was ʼn tou om haar nek,” het Funani gesê.

Die polisie het aanvanklik ʼn geregtelike doodsondersoek van stapel gestuur om vas te stel of vuilspel betrokke was, maar dit is spoedig na moord verander, waarna Xander by sy huis in Stella in hegtenis geneem is.

“Die verdagte is ook ʼn voormalige leerder aan die skool. Hy is Sondagoggend formeel aangekla en het ʼn bekentenis by die polisie gemaak dat hy glo die twee meisies vermoor het,” het Funani gesê.

Die motief vir die voorval word nog ondersoek.

Lees die vorige berigte oor Hoërskool Stella op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

111 Kommentare

jongste oudste gewildste
Sunette

Groot slag vir ons gemeenskap. Sterkte aan al die betrokke partye.

leon

Ek kan dit amper nie glo nie! Hoe kan ons Afrikanerjeug tot só ‘n daad oorgaan? Twee pragtige dogters wat hulle hele toekoms nog voor hulle gehad het. My hart gaan uit na die ouers en hul geliefdes. Mag Die Vader julle omvou met sy vlerke in hierdie baie hartseer en moeilike tyd. My hart gaan ook uit na die verdagte se geliefdes.

Marinda

Dis n baie groot tragedie. Wat deur die jong man se kop gegaan het sal seker nog uitkom. Ek dink ons kinders gaan deur baie stres deesdae. Ouers verloor hul werk en sukkel om weer werk te kry. Dan skei die ouers agv finansies en die kinders sien al die dinge gebeur. Sy was seker sy hele lewe gewees en kon nie die verwerping aanvaar het nie. Sterkte aan al die families hier betrokke.

Willem

Jag is in ons bloed.

Marisa Bekker

Dis ongelooflik tragies! Wat ek wil weet is hoe gebeur so ‘n verskriklike ding en die enigste bron wat enige iets daaroor berig is Maroela media? Niks op enige ander nuusinstansie se blaaie….?