Talle beseer toe rowers op bus toeslaan

Foto ter illustrasie: Greyhound South Africa

Nege gewapende rowers het die naweek buite Emalahleni (Witbank) in Mpumalanga op ʼn Greyhound-bus geklim en die 49 passasiers van geld, selfone en paspoorte beroof.

Gavin Gates van South African Community Crime Watch (SACCW), ʼn organisasie sonder winsoogmerk wat misdaad help bestry, sê die polisie het hulle Saterdagoggend net ná middernag na die polisiestasie in Emalahleni ontbied om bystand aan die passasiers te verleen.

Die voorval het sowat ʼn halfuur tevore by ʼn vulstasie aan die N12 in Delmas se rigting gebeur nadat die bus, onderweg van Johannesburg na Emalahleni, Mbombela en Mosambiek, stilgehou het sodat die passasiers ʼn draai kon loop en iets te ete koop.

Net nadat almal terug op die bus geklim het, het nege gewapende mans op die bus geklim.

“Net nadat almal terug op die bus geklim het,” vertel Gates, “het nege gewapende mans op die bus geklim. Dit het geklink asof hulle na een spesifieke ou gesoek het nadat hulle inligting ontvang het dat hy ʼn groot bedrag kontant by hom het.”

Toe die nege nie dié persoon kon opspoor nie, het hulle die passasiers beveel om op die grond te gaan lê, vertel Gates. Van hulle is met vuurwapens oor die kop geslaan en een van die rowers het ʼn skoot in die bus se dak geskiet, moontlik om die passasiers te dwing om gehoor te gee aan hul opdrag.

Die rowers het ook ʼn paar sitplekke uitgebreek, moontlik om plek op die grond vir al die passasiers te maak, en hulle toe van beursies, selfone en paspoorte beroof, vertel Gates.

Nadat die rowers die bus verlaat het, het die bestuurder met sy passasiers tot by die polisiestasie op Emalahleni gery, waar paramedici van hulle vir kop- en ander beserings behandel het.

Ek het erger verwag.

“Van die mense was ʼn bietjie gerattle, maar nie baie erg nie,” vertel Gates. “Ek het erger verwag.”

Die plaaslike blitspatrollie het die bus later tot by die polisiestasie op Delmas vergesel, want die passasiers kon nie hul reis sonder geld en paspoorte voortsit nie.

Jasen Smallbone, hoofbedryfsbeampte van Unitrans Passenger Services wat Greyhound besit, was nie Maandag beskikbaar om kommentaar te lewer nie. Maroela Media wag ook steeds op terugvoer van die polisie oor die voorval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
sweiz

Dit is omdat ons nie regte polisie het wat misdaad kan bekamp nie , die misdadigers verwys na die polisie as twintig rand narre.

ANONIEM

Ek hoop hierdie kom by die buite land uit sodat hulle kan sie in watter hel hool ons bly.

1+1

‘n Bus vol toeriste is ‘n sagte teiken. Rowers is nie stupit nie. Hierdie tipe busse vervoer mense met geld, maar veral duur elektroniese toerusting.

Alida

Dit is n tragiese voorval. Ek het ook in die verlede Greyhound gery. As die passasiers terugkeer van die toilette af staan beide bestuurders by die deure. Hulle onthou nie elke gesig nie maar hoe kon hulle nie agterkom hierdie varke was nie op die bus nie.

IK

Weggesteekte kameras is dalk deel vd oplossing?