Taxi-staking: 5 moorde, 120 inhegtenisnemings

(Foto: Ashraf Hendricks/GroundUp)

Wetstoepassingsbeamptes het sedert Donderdag hul hande vol nadat geweld in Kaapstad uitgebreek het weens die Suid-Afrikaanse Nasionale Taxiraad (Santaco) se voortslepende staking. Vyf moorde en 120 inhegtenisnemings is in verband met die staking aangemeld.

Só het Bheki Cele, minister van polisie, Dinsdagmiddag by die Station Deck Taxi-staanplek in Kaapstad gesê.

Volgens Cele is die eerste moord Donderdag in Ntlangano-singel in Nyanga aangemeld, toe ’n 40-jarige Britse man doodgeskiet is.

Zanikhaya Kwinana (33), ’n lid van die Wes-Kaapse regering se program vir die bevordering van wetstoepassing, beter bekend as LEAP, is Vrydag omstreeks 20:15 by Miller-weg in Nyanga doodgeskiet, terwyl hy aan diens was.

Drie mans is Saterdag en Maandag onderskeidelik in Mfuleni, op die afdraaipad na die Kaapstad Internasionale Lughawe, en in Borcherds Quarry-weg in Nyanga geskiet.

“Plundering, motors wat met klippe bestook is, voertuie wat aan die brand gesteek word, infrastruktuur wat beskadig is, lede van die publiek wat gedreig en geïntimideer word, asook paaie wat versper word, was die afgelope paar dae in die Moederstad aan die orde van die dag,” het Cele gesê.

???? Bheki Cele you can negotiate with criminals, we won't! Watch as the Mayor of Cape Town, Geordin Hill-Lewis stands for the rule of law on the #TaxiStrike.

"We are protecting residents. We cannot negotiate which portions of the law will apply to some people and not to others." pic.twitter.com/AUVu6KSD3K

— DA Western Cape (@WesternCapeDA) August 8, 2023

Cele het bevestig altesaam 120 mense is vir verskeie oortredings – wat met die staking verband hou – in hegtenis geneem. Die oortredings wissel van kwaadwillige skade aan eiendom tot openbare geweld en plundering.

Verder is altesaam 53 minibustaxi’s naby die lughawe geskut. Dit was tydens ’n geïntegreerde operasie (waarby die polisie én die Stad Kaapstad se verkeersdienste en metropolisie betrokke was) om die toegangspad na die lughawe oop te stel en verkeer te laat vloei. Taxi’s het van Maandag vroegoggend af dié pad versper.

Daar word verder vyf moordsake, ’n saak van poging tot moord, openbare geweld, brandstigting, gewapende rooftogte, motorkaping en talle gevalle van kwaadwillige saakbeskadiging ondersoek.

Die polisie bly tans op ’n hoë gereedheidsgrondslag.

“Ons vra dat alle betrokke partye so gou moontlik ’n ooreenkoms bereik en dat die taxi-bedryf die wet sal nakom. Wetsgehoorsame burgers word versoek om binne die grense van die wet op te tree en alle dade van misdadigheid by die polisie aan te meld.”

(Foto: Ashraf Hendricks/GroundUp)

Cele het ook die aantygings dat hy die taxi-staking aangevuur het, in die kiem gesmoor.

“Ek wil die rekord regstel met betrekking tot my bywoning van ’n vergadering met rolspelers in die taxi-bedryf. Dit is binne die mandaat van die ministerie wat verantwoordelik is vir die voorkoming, bekamping en ondersoek van misdaad om in te gryp en beplande skuldoorsaak af te weer wat burgers nadelig raak. In geen stadium sal ek as die nasionale minister van polisie stakings aanhits nie.”

Skole steeds gesluit

(Foto: Ashraf Hendricks/GroundUp)

Altesaam 71% van die leerders in die skole in die stad kon teen Dinsdag weens die staking steeds nie skool toe gaan nie. Dit is ’n totaal van 852 259 leerders.

Altesaam 17 725 onderwysers en ander skoolpersoneel kon Dinsdag ook nie by skole uitkom nie.

In die geheel moes 92 skole noodgedwonge hul deure sluit en talle ander skole het leerders vroeër huis toe gestuur. Dié getal het omtrent verdriedubbel sedert Maandag.

“Die staking het ’n verwoestende uitwerking op onderrig en leer in ons provinsie. Dit terwyl ons nog van die negatiewe uitwerking van die Covid-19-pandemie probeer herstel,” sê David Maynier, LUR vir onderwys in die Wes-Kaap.

Die Kaapse metro-onderwysdistrikte word steeds die ergste geraak, met ’n aanwesigheidsyfer van tussen 10% en 20%. Ontwrigting van die leerdervervoerskema in die Kaapse Wynland- en Weskus-onderwysdistrikte het ook daartoe bygedra dat minder leerders skool toe gaan.

“Party leerders kon nie die skool bereik nie weens die ontwrigting in openbare vervoer. Ander is weer om veiligheidsredes deur hul ouers by die huis gehou.”

Volgens Maynier is geen aanvalle op skole of die beskadiging van skooleiendom aangemeld nie.