Malesela Teffo se regsprobleme word al meer.
Die voormalige advokaat wat vroeër van die rol geskrap is, is Dinsdag in hegtenis geneem op aanklag van bedrog, aanranding, opsetlike saakbeskadiging en onwettige betreding.
Kol. Dimakatso Nevhuhulwi, polisiewoordvoerder, het dié nuus Woensdag aan Maroela Media bevestig. Daar is tans min besonderhede rondom die inhegtenisneming beskikbaar.
Nevhuhulwi sê Teffo sal Donderdag in die Pretoriase landdroshof verskyn.
Teffo was ten tyde van die inhegtenisneming uit op borgtog nadat hy van aanranding en onwettige betreding aangekla is en toe versuim het om in die hof te verskyn.
Teffo, eens die regsverteenwoordiger van vier van die vyf beskuldigdes in die opspraakwekkende moord op die voormalige Bafana Bafana-kaptein Senzo Meyiwa, is verlede jaar van die rol van advokate geskrap.
Dit nadat daar 22 bewerings van wangedrag teen Teffo by die regspraktykraad geopper is. Dié bewerings sluit onder meer in minagtende gedrag in die hof, die misleiding van die hof en die wanbesteding van geld.
Teffo is in Mei verlede jaar, nog geklee in sy toga, in die Pretoriase hooggeregshof in boeie geslaan nadat daar ʼn lasbrief vir sy inhegtenisneming uitgereik is.
hy gaan gratis raad gee in die tronk
Goeie nuus!!
Wens soms ek kan voor sulke outjies gaan staan en lekker in sy gesig lag
Gemors !
Hierdie man is nou die grootste hofnar wat ek al ooit gesien het.
Ai. Hoe gooi mens jou lewe se weg…