(Argieffoto: Miguel Roberts/AP)
Twee mense is dood en ses ander gewond toe ʼn skietery Donderdagaand by ʼn taverne in Malamulele in Limpopo uitgebreek het. Die voorval het omstreeks 20:00 plaasgevind.
Die provinsiale polisiekommissaris, lt.genl. Thembi Hadebe, het nou gevra dat ʼn “hoëvlakondersoek” na die voorval van stapel gestuur word.
Volgens kol. Malesela Ledwaba, polisiewoordvoerder, het ongeveer agt mans die taverne ingegaan en lukraak losgebrand. Twee mense is op die toneel dood verklaar terwyl ses beseerdes na ʼn nabygeleë hospitaal gehaas is.
“Verskeie patroondoppies wat van ʼn pistool afkomstig is, het op die misdaadtoneel gelê,” het Ledwaba gesê.
“Daar word verder beweer dat die verdagtes in twee dubbelkajuitvoertuie van die toneel gevlug het. Die motief vir die skietery is in hierdie stadium onbekend.”
Hadebe het die “sinnelose misdaad” veroordeel en die polisie opdrag gegee om die skuldiges so gou moontlik vas te trek.
Drank en vuurwapens is ‘n gevaarlike kombinasie kommissaris. Geen “hoëvlakondersoek” nodig wat hulpbronne onnodig uitput en daar inelkgeval dadels van gaan kom nie.