(Argieffoto: SA Polisie)
Twee mense is reeds agter tralies in verband met die skietdood van ʼn vrou voor ʼn munisipale kantoor in die Strand. Die verdagtes, onderskeidelik 26 en 46 jaar oud, is Dinsdag in hegtenis geneem nadat die 41-jarige vrou ʼn dag tevore in die parkeerterrein van die kantoor doodgeskiet is.
Maroela Media het vroeër berig die slagoffer – wat ten tyde van die voorval alleen in die voertuig was – het skaars met haar silwerkleurige Toyota Fortuner by die parkeerterrein langs Hoofweg stilgehou, toe verskeie skote op haar afgevuur is.
Sy is etlike keer getref en mediese personeel het haar op die toneel dood verklaar. Die verdagte het weggestap, in ʼn wegkomvoertuig, ʼn wit Opel Astra, geklim en van die toneel gevlug.
Kapt. FC van Wyk, Wes-Kaapse polisiewoordvoerder, sê verskeie verklarings van ooggetuies is verkry en die wegkomvoertuig is geïdentifiseer.
“Die voertuig is later by ʼn perseel in Site C by Khayelitsha opgespoor, waar die polisie daarop beslag gelê en as ʼn bewysstuk by Stikland ingedien het.”
Foto: Verskaf)
Van Wyk sê die vrou het tydens haar dood vir die Stad Kaapstad se gesondheidsdepartement gewerk.
“Haar man is in Oktober verlede jaar in Qumbu in die Oos-Kaap doodgeskiet.”
Die polisie het geen verdere besonderhede hieroor bekend gemaak nie.
Van Wyk sê albei verdagtes sal na verwagting Woensdag in die Strand-landdroshof op aanklag van moord verskyn.
Dit klink eerder na twee sluipmoorde.
Die wat dit beplan het sal nooit aan die pen ry nie.
@SwartBees
Lyk my jy bly nie in SA…
Als het agteruitgegaan