[Video] Ma waarsku: ‘Hou jul kinders dop’

'n Skermskoot uit die video.

‘n Skermskoot uit die video.

ʼn Ma van Johannesburg, wie se tweejarige dogtertjie glo amper in ʼn winkel ontvoer is, het ander ouers gewaarsku om ekstra versigtig te wees wanneer hulle met hul kinders in openbare plekke is.

Jennylee Jordaan (24) het Woensdag beeldmateriaal van die voorval op haar Facebook-profiel gedeel. Sy het vertel sy was omstreeks 10:30 Dinsdagoggend in ʼn klerewinkel met haar tweejarige dogter in die sitplek van die winkelwaentjie.

“Die winkel was leeg en ek het nie eers gesien toe drie mans die winkel binnekom nie. Ek het dit eers later op die beeldmateriaal van die winkel se veiligheidskameras gesien,” het Jordaan aan Maroela Media gesê. “Terwyl ek besig was om te betaal, het die winkelwaentjie met my dogtertjie in so effens skuins agter my gestaan. Ek het net gehoor hoe my kind sê “mamma” en ek het omgedraai en gesien hoe ʼn man met haar in sy hande staan.”

Jordaan het gesê sy was so geskok dat sy nie ʼn woord kon uitkry nie en die man net aangestaar het. “Hy het haar vinnig terug in die waentjie gesit en in Engels gesê ‘Nee jong, moenie in die waentjie regop staan nie. Jy moet sit’.” Volgens Jordaan het die drie mans nog ʼn rukkie in die winkel vertoef en sy is met haar dogtertjie uit die winkel uit.

“Ek is die volgende dag terug na die winkel toe om hulle te vra of ek die beeldmateriaal van die veiligheidskameras kan sien. Daar het ek presies gesien wat gebeur het,” het sy gesê.

“Die winkelassistente het gesê die man het moontlik my kind opgetel om te sien of my handsak onder haar is, maar my handsak was oop en bloot oor my skouer. Ek is seker as dit is waarna hy op soek was, sou hy opgemerk het die handsak is by my. My instink het net heeltyd vir my gesê daar is iets baie verdag aan die saak. Ek dink hy het my kind probeer vat.”

Volgens Jordaan was sy by die polisie om ʼn klag van poging tot ontvoering in te dien, maar die polisiebeampte aan diens het gesê daar is nie iets soos ʼn poging tot ontvoeringaanklag nie. Hulle het haar glo na ʼn ander polisiestasie verwys.

Lt.kol. Lungelo Dlamini, die provinsiale woordvoerder van die polisie in Gauteng, het aan Maroela Media gesê daar bestaan wel ʼn poging tot ontvoeringaanklag, maar die polisie neem sekere elemente in ag voordat ʼn saak geopen word. “Dit sal afhang van die omstandighede en die feite wat die klaer aan die polisie voorlê. Hulle sal dan besluit of daar genoeg bewyse of inligting is om ʼn saak oop te maak,” het hy verduidelik.

“ʼn Klag kan by enige polisiestasie ingedien word en dit word later oorgeplaas na die polisiestasie waar die beweerde voorval plaasgevind het.”

Jordaan het gesê sy sal later vandag na nog ʼn polisiestasie gaan om vas te stel of sy ʼn klag kan indien. “Ek wou net die beeldmateriaal met ander ouers deel sodat hulle kan sien hoe vinnig so iets gebeur. Dit is enige ouer se grootste nagmerrie. Hou asseblief jul kinders die hele tyd dop in die winkels. Ek weet nie wat ek sou gedoen het as hulle my kind gevat het nie.”

We always think these things will never happen to us…In Mall of the South yesterday(26 July 2016) a man tried to take my 2 year old daughter out of my trolley, when she noticed she didn't know the person picking her up she immediately said mommy… that's when I looked. At that moment this man made it seem like he was helping her sit properly in the trolley. Which seemed like it could've been the case because she did stand up a few times in the trolley. My instinct told me otherwise and I went to get the camera footage this morning. My worst nightmare nearly came true… please please watch your kiddies closely in the shops… I dont know what I would have done if he'd taken her… ????

Posted by Jennylee Palmer on Wednesday, July 27, 2016

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
CF

Jou instink is heeltemal reg, hulle wou jou kind vat! My nekhare rys as ek so-iets sien!

Marina

Sjoe, genugtig my mond het nou letterlik oopgeval. Mammas asb as jou kind in ‘n waentjie is maak seker dat die waentjie die hele tyd binne jou oog is. Ek was so rukkie terug saam my kleindogter in die mall, mamma het heeltyd gestres, maar ek het seker gemaak sy is nie buite my sig vir EEN oomblik nie.

Monique

Ek sou nie so rustig gewees het nie ek sou hom dalk met die vuis of handsak geslaan het.

Wilmien

Sjoe, dis scary…..mense los liewer klein kindertjies by die huis ….kyk hoe vining gebeur so iets.
Die lewe het lelik geword…..

Ekwilibrium

Dank Vader. Van al die sinistere moontlikhede, seker iets te doen met muti… Hulle moet gevang word en gou; waar gaan hulle volgende toeslaan?