Video van mans wat kameelperd laat neerval, veroordeel

Die kameelperd nadat hy neergeval het. (Skermgreep uit video op Facebook)

’n Video wat wys hoe ’n groep jong mans ’n kameelperd met ’n voertuig jaag voordat die dier eindelik verbouereerd oor ’n heining spring en op die grondpad neerval, het hewige kritiek op sosiale media ontlok.

Die video is aanvanklik op TikTok gedeel, maar sedertdien ook wyd op ander platforms versprei.

Daar kan in die betrokke video gesien word hoe die kameelperd tot die insittendes van die voertuig se vermaak in die pad af gejaag word. Die verbouereerde dier spring dan verward teen die draadheining wat langs die grondpad loop, in ʼn poging om van sy agtervolgers te ontsnap. Sy lang lyf tuimel oor die heining en hy val kop eerste op die grondpad aan die ander kant van die draad. Die kameelperd probeer een laaste keer halfhartig opstaan, voor hy lank roerloos bly lê. Die insittendes van die voertuig, wat klink soos ’n groep jong mans, lag en gil deurentyd opmerkings.

Die kameelperd word pad af gejaag. (Skermgreep uit video op Facebook)

“Nou’s hy f*****p,” sê een, terwyl ’n ander insittende snedig sê: “Ag, ’skies.”

Die persoon agter die kamera word gevra of hy dit op video vasgevang het. Sommige insittendes, onder wie die bestuurder van die bakkie, klim dan uit en stap nader. Daar word gefluit en die kameelperd word aangemoedig om op te staan. “Kom, seun, kom,” sê die een.

Een van die ander vergelyk die dier se val met ’n harde “tackle”.

“Hy moet nou maar vrek” en “skiet hom” is van die ander opmerkings voordat die kameelperd eindelik weer op sy voete kom en die veld in hardloop.

Die video is onlangs deur ene @benniebeatbox op TikTok geplaas, maar dit blyk die rekening is intussen verwyder.

Die kameelperd spring op teen die draadheining. (Skermgreep uit video op Facebook)

“Mense soos dié hoort nie naby wild nie,” lui ’n inskrywing deur ’n sosialemediagebruiker op Facebook. Die video op Facebook is meer as 87 000 keer gekyk.

Die groep mans word deur verskeie sosialemediagebruikers van wreedheid teenoor diere beskuldig terwyl sommige na die mans kap wat deurgaans in die video uitbundig lag.

Dit is nie in dié stadium duidelik waar of wanneer die voorval plaasgevind het of wie daarby betrokke was nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
ES

Die wiel draai, perde – en as hy draai dan spin hy.

Hester Wilhelmina

Julle sal vir my moet trrughou as ek naby hulle kom….

Pieter

Ek sal skaam kry as ek hulle is nie lag nie. Dit is omdat kinders van vandag nie meer pak slae kry nie. As jy dit op my plaas doen dan jaag ek jou weg.

Ovelia

Ek hoop jul word ook eendag so gejag. Wat se maniere ht julle. Julle is so wreed

Genis

Verstommende, on opgevoede gedrag! Kan bly wees ek was nie daar nie… Wat jy uitdeel sal jy ontvang ne…