Vlak 2: SA’ners mag nou sóveel kuiergaste oornooi

Dr. Nkosazana Dlamini-Zuma gedurende Maandagmiddag se mediakonferensie. (Foto: Siya Duda/ GCIS)

Suid-Afrikaners mag nou tot soveel as tien gaste vir sosiale doeleindes na hul huise oornooi mits die gasheer en gaste te alle tye maskers dra en sosiale afstand handhaaf.

Gimnasiums word ook eindelik weer toegelaat om hul deure oop te maak, hoewel gimnasiums se kapasiteit tot 50 mense op ʼn slag beperk word.

Dr. Nkosazana Dlamini-Zuma, die minister van samewerkende regering en tradisionele sake, het die nuwe regulasies wat gedurende vlak 2 van die afsonderingstydperk sal geld Maandagmiddag aangekondig. Dié regulasies is vroeër vandag in die Staatskoerant gepubliseer.

Vlak 2 van die afsonderingstydperk tree vanaand om middernag in werking. Die koop en verkoop van alkohol en tabakprodukte word gedurende dié vlak eindelik weer toegelaat. Beperkings op interprovinsiale reise word ook opgeskort sodra vlak 2 in werking tree.

(Argieffoto: Unsplash)

Volgens Dlamini-Zuma sal drankwinkels voortaan toegelaat word om alkohol vanaf Maandae tot Donderdae tussen 09:00 en 17:00 te verkoop. Suid-Afrikaners mag wel daagliks ʼn drankie tot 22:00 by instansies soos restaurante en kroeë met ʼn dranklisensie geniet.

Dié instansies sal egter beperk word tot 50 klante op ʼn slag.

Nagklubs bly gesluit weens die hoë risiko van oordrag wat dit inhou.

Dlamini-Zuma het verder gesê hoewel die koop en verkoop van tabakprodukte ná vyf maande eindelik weer toegelaat word, Suid-Afrikaners nié aan dieselfde sigaret moet rook nie aangesien Covid-19 só oorgedra kan word.

Daar is egter geen beperkings op die verkoop van tabakprodukte nie, het Dlamini-Zuma bevestig.

Argieffoto

Die aandklokreël bly van krag tussen 22:00 en 04:00 en slegs diegene wat ʼn permit het of moet reis weens ʼn mediese noodgeval sal toegelaat word om in dié tydgleuf rond te beweeg.

Volgens Dlamini-Zuma is die aandklokreël in dié stadium nog nodig om te verhoed dat motoriste in die nag onder die invloed van alkohol bestuur veral noudat die verkoop en koop van alkohol weer toegelaat word.

Byeenkomste soos troues, begrafnisse en godsdienstige byeenkomste word steeds beperk tot 50 gaste, roubeklaers of kerkgangers. Nagwake word in dié stadium steeds nie toegelaat nie.

Akkommodasiegeriewe en toere word wel nou weer toegelaat kragtens goedgekeurde protokol om sosiale afstand te verseker. Dít terwyl biblioteke, museums, dieretuine en akwariums weer hul deure mag oopmaak en strande en parke weer besoek mag word, het Dlamini-Zuma gesê.

Volgens die minister sal wateraktiwiteite soos skubaduik ook weer toegelaat word hoewel plesierskepe in dié stadium geanker bly.

Argieffoto ter illustrasie (Foto: Unsplash)

Fliekteaters mag bedrywighede hervat teen ʼn kapasiteit van 50%.

Geen toeskouers word by sportbyeenkomste toegelaat nie.

Persone mag vir die duur van die ramptoestand nie uit hul woonplekke gesit word nie. Huise mag ook nie gesloop word nie tensy ʼn hofbevel uitgereik is vir uitsetting of sloping.

Die dra van maskers in die openbaar bly verpligtend, terwyl die huidige beperkings op internasionale reise van krag bly.

Dlamini-Zuma het daarop gewys dat Suid-Afrika ʼn moeilike vyf maande agter die rug het met talle opofferings wat gedurende dié tyd gemaak is.

Die minister het egter vanmiddag gewaarsku dat Suid-Afrikaners nou waaksamer as ooit moet wees om ʼn tweede golf virusinfeksies te voorkom. “Die risiko van infeksie bestaan steeds. Die virus beweeg nie vanself nie. Mense versprei die virus.”

Vir die volledige regulasies klik hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

69 Kommentare

jongste oudste gewildste
Manie

Voorwaar nou nie ‘n van Gogh skepping nie…….

Marius

Tien gaste en met maskers op te alle tye ?? Ek kan jou belowe dit gebeur nie in alle plekke nie , en dit is die mense wat dit juis moet doen en glad nie eers bymekaar moet kuier nie .

Jacques

Fliek teaters kan oopmaak teen 50% kapasiteit. Maar sportbyeenkomste mag nie toeskouers hê nie. Of ‘n kerk wat 800 mense kan neem mag slegs 50 mense teenwoordig hê, wat 6,25% kapasiteit is. Waar is die logieka? Is Christene super verspreiders van die virus?

En glo my, wanneer ek gaste oornooi gaan ons nie sosiale distansie in my huis hou nie en sal ons ook nie maskers dra nie. Wat is die punt van kuier dan?

Piet

Nou as die restuarante mag oop wees tot 2200 hoe moet die kelners, kokke en eienaars by die huis kom??

Thelma

Miskien eendag as ek groot word sal die wysheid kom want wraggies, nie als hier maak sin nie. Ek kan 100 vrae vra maar dit sal onbeandwoord bly, dus waardeer ek die klein vordering en plesiertjies wat oppad is.