Terwyl alle ontspanningsoorde in Pretoria tot verdere kennisgewing gesluit sal wees, is sommige natuurreservate steeds tussen 09:00 en 18:00 oop vir die publiek.
Die Tshwane-metro het Woensdag ’n verklaring uitgereik oor hoe die aangepaste vlak 3-inperkingsregulasies die natuurreservate en ontspanningsoorde in die Jakarandastad raak.
Die ontspanningsoorde wat tot verdere kennisgewing gesluit is, sluit in Fonteine-vallei, Derdepoort, Rooihuiskraal, Ga-Mothakga, Kwaggaspruit, Zwartkop Lapa, Moretele, Bronkies Angling, Die Draai, Klipkruisfontein, Joos Becker-woonwapark en Rietvlei Angling.
Die Wonderboom-, Groenkloof-, Austin Roberts-, Klapperkop-, Rietvlei-, Faerie Glen- en Moreletakloof-natuurreservaat is tussen 09:00 en 18:00 oop vir die publiek.
Hierdie reservate sal slegs oop wees vir selfry-wildbesigtiging, stap- en bergfietsroetes. Drankgebruik is egter verbode tydens hierdie aktiwiteite.
Piekniekplekke en voëlbesigtigingsbomas in alle reservate is gesluit.
Alle damme en munisipale swembaddens asook alle kampeer- en piekniekplekke is vir die publiek gesluit.