Vuiste klap by skolerugby toe ouers spelers bestorm

(Foto: Skermskoot)

ʼn Rugbywedstryd tussen twee Gautengse skole het die afgelope naweek in ʼn liederlike vuisgeveg ontaard toe ouers die rugbyveld bestorm en glo sommige van die rugbyspelers bygedam het.

Die voorval het op Hoërskool Erasmus op Bronkhorstspruit se rugbyveld gebeur ná ʼn rugbywedstryd tussen die eerste spanne van dié skool en Zayo Academy in Groenkloof in Pretoria.

Francois van Tonder, afrigter van Zayo Academy se eerste rugbyspan, sê spelers van die twee spanne het aan die einde van die wedstryd slaags geraak voordat sommige ouers van Hoërskool Erasmus glo op die veld gehardloop en die spelers van die Zayo Academy bestorm het.

In video’s van die voorval kan gesien word hoe spelers in Zayo Academy-sportdrag gegryp word.

“Met ses minute se speeltyd oor, was die telling 31 – 29 in die guns van Hoërskool Erasmus. Zayo Academy het ʼn strafskop gekry wat die telling na 32 – 31 in die guns van Zayo laat draai het,” vertel Van Tonder aan Maroela Media.

(Foto: Skermskoot)

“In die laaste vyf minute van die wedstryd het Zayo Academy ʼn drie gedruk. In die opbou tot die drie, het Zayo se vleuel teen die kantlyn afgehardloop en voor hy uitgeduik is, het hy die bal binnetoe aangegee vir sy medespeler wat die drie gaan druk het.

“Die spelers van Erasmus het ʼn groot bohaai opgeskop dat die speler van Zayo oor die kantlyn getrap het toe hy die bal vir sy medespeler aangegee het. Ouers van Erasmus wat sowat tien meter weg was, het ook gesê die Zayo-speler was uit. Die skeidsregter en lynregter het bevestig dat die speler nie uitgetrap het nie en die drie is toegeken.”

Volgens Van Tonder het die ouers van Hoërskool Erasmus daarna oor die afbakening na die rugbyveld gespring en op die lynregter en skeidsregter begin vloek, terwyl hulle ook fisiek bygekom is.

“Hulle het die lynregter die k-woord toegesnou. Ek het nader geloop en vir die ouers gesê hulle moet aan die anderkant van die afbakening staan.”

Nadat gemoedere gekalmeer het, is die wedstryd hervat. Hoërskool Erasmus het die bal aangeslaan en die skeidsregter het die eindfluitjie geblaas, vertel Van Tonder.

“Die seuns het begin hand skud en vir geen verklaarbare rede nie het die haker van Erasmus een van ons flanke met die vuis bygekom. Die spelers het mekaar daarna gegryp.”

Van Tonder sê die situasie het handuit geruk toe Erasmus se ouers op die rugbyveld gehardloop en “fisiek met die spelers van Zayo geraak het”.

“Dit was skokkend om te sien hoe die personeel van Erasmus eenkant gestaan en niks gedoen het nie.”

Volgens Van Tonder het sommige ouers van die Zayo-spelers ook later op die veld gehardloop.

“Dit is verstaanbaar, want geen ouer sal staan en toekyk hoe sy of haar kind geslaan word nie.”

Cathy van Tonder, skoolhoof van Zayo Academy, sê die skool is geskok oor die voorval.

Die skool het ʼn brief aan die Blou Bul-skolerugbyvereniging – wat Maroela Media onder oë gehad het – gerig om die vereniging oor die voorval in te lig.

In die brief dui Cathy aan dat sy die polisie die betrokke dag gebel het, maar hulle het nie opgedaag nie.

Volgens Cathy ontvang sy dreigemente sedert die voorval en die skool loop deur onder “lelike en afbrekende kommentaar”.

Sy sê sommige van die leerders wat aangerand is, is erg getraumatiseerd.

“Die een seun wil glad nie meer rugby speel nie,” vertel sy.

Etienne Rossouw, skoolhoof van Hoërskool Erasmus, wou nie oor die aangeleentheid kommentaar lewer nie.

Hy het aan Maroela Media bevestig dat ʼn ondersoek aan die gang is en sê die beheerliggaam sal mettertyd ʼn verklaring uitreik.

Maroela Media het ook  ʼn navraag aan die Gautengse departement van onderwys gerig, maar wag nog vir terugvoer.