Vyf vas wat glo plaas wou aanval

Twee vuurwapens en ammunisie is in die motor gevind. (Foto: SA Polisie)

Die gemeenskap van Fouriesburg in die Vrystaat het die inhegtenisneming Donderdag van vyf mans, wat glo ʼn plaasaanval in die omgewing beplan het, verwelkom.

Sers. Fikiswa Matoti, polisiewoordvoerder, sê lede van die polisie op Bethlehem se eenheid vir openbare orde, asook lede van die honde-eenheid daar het inligting van hulle kollegas by misdaadintelligensie oor die groep ontvang.

“Omstreeks 07:00 vanoggend het hulle met die operasie begin. Voertuie is op spesifieke plekke geplaas en die pad is versper. Hulle het ʼn verdagte voertuig gesien en dit voorgekeer,” sê sy.

Die vyf insittendes van die voertuig is in hegtenis geneem nadat ʼn R1-aanvalsgeweer, 15 koeëls en ʼn Norinco-pistool met nege koeëls in die voertuig gevind is.

Hulle word aangekla van sameswering om ʼn gewapende rooftog te pleeg, die besit van ongelisensieerde vuurwapens en die besit van ammunisie sonder ʼn lisensie.

“Die voorlopige ondersoek dui daarop dat twee van die verdagtes oudpolisielede van Ficksburg is. Die ander drie is van Botshabelo,” sê Matoti.

Hulle sal binnekort in die hof op Fouriesburg verskyn.

Riaan Corbett, Vrystaat Landbou se veiligheidsverteenwoordiger in Fouriesburg, sê die streek het ʼn doeltreffende landelike beveiligingsplan en baie goeie samewerking met die polisie.

Hy het die inhegtenisneming verwelkom.

“Ons is baie bly hieroor. Dit is net genade. Ons kan net dankbaar wees dat hulle in hegtenis geneem is voordat iets gebeur het,” sê Corbett.

Daar was die afgelope ruk hernieude oproepe op pres. Cyril Ramaphosa om meer kragdadig standpunt in te neem teen aanvalle op plase.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
James

Waar kom die wapens vandaan…

Anoniem

Goed gedoen – Dankie !

Johan

Dit lyk sommer báie verdag dat Ramaphosa weier om die plaasmoorde te veroordeel! Of hou hy by sy standpunt dat die boere nie vermoor word nie?

christine

Wel gedaan anders was daar nog n boer wat hul sou vermoor het .Cyril Rhamaposa moet begin iets doen .

Dries

‘N R1 AANVALSGEWEER, Min. Cele! En dan wil jy ons ontwapen…