Woede oor miljoene vir Kubane wat SA onnies oplei

Die minister van basiese onderwys, Angie Motshekga. (Skermgreep: Newzroom Afrika)

Die departement van basiese onderwys het die afgelope vyf jaar miljoene rande opgedok aan Kubaanse spesialiste wat kwansuis Suid-Afrikaanse onderwysers in wiskunde en wetenskap moet oplei.

Onderwyskenners beskou dit as ʼn klap in die gesig van Suid-Afrikaanse onderwysers wat kenners op hul vakgebied is.

Angie Motshekga, minister van basiese onderwys, het in antwoord op ʼn parlementêre vraag van die DA gesê haar departement het ʼn ooreenkoms met Kuba dat sowat 20 spesialiste vir vyf jaar aangestel word. Die ooreenkoms geld vanaf 2017 tot 2022.

Sedertdien is tussen 14 en 19 Kubane jaarliks in die nasionale of van die provinsiale departemente van onderwys werksaam. Dié spesialiste kry ʼn jaarlikse salaris van net meer as R733 000 per jaar, wat beteken dat die regering sedert 2017 jaarliks tussen R10 miljoen en R14 miljoen aan die Kubane bestee het.

Volgens resultate van die Trends in International Mathematics and Science Study (TIMSS) vir 2019 is die standaard van Suid-Afrikaanse leerders in graad 5 en 9 in wiskunde en wetenskap steeds van die heel swakste in die wêreld.

“Die Kubane is spesialiste in wiskunde en wetenskap. Hierdie vakke word beskou as skaars vaardighede en ons sukkel om behoorlik opgeleide onderwysers hiervoor te kry. Die spesialiste is besonder bekwaam daarin om onderwysers te help om moeilike konsepte in dié vakke baas te raak,” sê Motshekga in haar antwoord. “Sedert die Kubane aangestel is, het hulle die departement aansienlik gehelp om materiaal te ontwikkel om moeilike konsepte aan onderwysers oor te dra en ook om beter maniere te ontwikkel om uitdagings in die onderrig van wiskunde te oorkom.”

(Foto: Christa Steyn Bezuidenhout)

Dié opmerking krap onderwyskenners egter omtrent om. “Dit is onaanvaarbaar dat Suid-Afrika buitelanders aanstel terwyl daar onderwysers in ons land is wat uiters kundig op dié vakgebied is,” sê Desiree van der Walt, die DA se skaduminister van onderwys.

Sy is boonop skepties oor hoekom juis Kubane aangestel is, aangesien die taal alleen reeds ʼn uitdaging is. Dit is nie seker hoe suksesvol Kubaanse onderwysers in hul eie land is nie, aangesien Kuba aan geen internasionale assesserings vir onderwys deelneem nie.

Solidariteit se Skoleondersteuningsentrum (SOS) het ook uitgevaar teen dié ooreenkoms met Kuba.

“Belastinggeld wat ten duurste aan sogenaamde Kubaanse kenners bestee word, is ʼn klap in die gesig van belastingbetalers en onderwysinstellings wat oor uitstekend opgeleide kenners beskik wat die plaaslike konteks, kultuur en unieke uitdagings van gemeenskappe ken,” sê Leon Fourie, uitvoerende hoof van die SOS.

Hy wys daarop dat Suid-Afrika self verskeie onderwyskenners met dieselfde en hoër akademiese kwalifikasies as die Kubaanse spesialiste het.

Celeste Labuschagne, hoof van WETO (Wetenskaponderwysersvereniging) by die SOS, sê daar is baie Afrikaanse onderwysers met omvangryke ervaring in wetenskaponderrig wat ʼn groot bydrae tot Suid-Afrikaanse onderwys kan lewer. “Geen van hierdie vakkenners is deur die onderwysdepartement genader aangaande ʼn probleem met wetenskap in Suid-Afrikaanse skole nie. Die SOS beskik self ook oor onderwyskenners wat graag van hul kundigheid sal deel op die gebied van wetenskaponderrig in Suid-Afrika.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

47 Kommentare

jongste oudste gewildste
Oom Hennie Pennie

Hoekom kan vakbonde en bestuur liggame nie opstaan hierteen nie?

Kokerboom

Wat is die vervloekte ANC kader se obsessie met die Kubane? Ons weet dis pay back time maar waaragrig het die skepsels GEEN waarde vir geld. Het hul geen skaamte of gewete? Die twak moet nou stop!! Hoe regverdig hul die sinnelose aksies????

Tanja

Waar daar ń rookie trek …is anc besig om te plunder

Diline

Dit gaan als net oor “payback time” vir die Kubane. Selfde storie met die klomp wat kamstig SA toe moes kom om riool probleme te kom uitsorteer teen miljoene rande. Dis al net ‘n klugspul, verryk Kubane uit ons belasting betalers se geld, skuld hulle mos vir hulle bystand tydens apartheid.

Renata

Kubane word ingevoer as dokters, ingeneurs in waterwerke en as spesialiste in onderwys. Daar is mos nou onlangs berig dat die ANC besig is om hul skuld aan Kuba terug te betaal op hierdie manier. Nou ja, dit spreek hard en duidelik wie die ANC terroriste van opleiding en wapens en bomme voorsien het voor 1994 en waarom daar terugbetaling verwag word.