Zondo se ‘desperaatheid ongekend’ – Zuma-stigting

Oudpres. Jacob Zuma (Foto: ANA)

Die “desperaatheid van adjunkhoofregter [Raymond] Zondo wat sy posisie misbruik as tweede in bevel van die Konstitusionele Hof en sy bevele aan ondergeskiktes om die land se wetgewing te buig, is ongekend” het die Jacob Zuma-stigting Maandagoggend weer uitgevaar.

Die Zondo-kommissie van ondersoek na staatskaping het die Konstitusionele Hof vroeër genader vir ʼn dringende bevel dat oudpres. Jacob Zuma die hof minag en gevra dat hy twee jaar tronkstraf opgelê moet word omdat hy ʼn dagvaarding om voor die kommissie te gaan getuig, verontagsaam het.

Zuma moes verlede maand ingevolge die bevel voor die kommissie verskyn, maar het nooit opgedaag nie en het toe boonop teenoor die regbank uitgevaar.

Die stigting sê nou wetgewing maak voorsiening vir tronkstraf van ses maande, of 55 pond [die wetgewing dateer uit 1947] en verwys nie na die twee jaar waarvoor die kommissie vra nie.

“Die meester het opdrag gegee … dit is duidelik dat wetgewing gewysig word wanneer dit kom by pres. Zuma – nes die apartheidsregering Sobukwe-wetgewing geskep het om [Robert] Sobukwe te hanteer,” lui die verklaring.

“Dit klink inderdaad nes ʼn ou apartheidsregering in die hande van swart leiers in die demokratiese Suid-Afrika,” lui die stigting se verklaring voorts.

Zuma het vroeër ook na Sobukwe, ʼn destydse leier van die PAC, verwys en toe gesê Sobukwe is spesifiek geteiken vir sy “ideologiese standpunt oor bevryding”.

Die stigting sê die kommissie vra in sy verklaring vir ʼn bevel wat die oudpresident se regspan “openlik aangebied” het en wat verwerp is.

“Ons vind die oneerlikheid kommerwekkend op hierdie vlak en nie gepas vir ʼn regsproses van hierdie omvang nie.”

Zuma speel nou al jare lank kat en muis met die Zondo-kommissie wat op die been gebring is om die plundering van die staat se koffers tydens sy nege jaar lange termyn as president te ondersoek. ʼn Strydlustige Zuma het vroeër gesê hy is nie bang om in hegtenis geneem, vervolg of tronkstraf opgelê te word nie.

Zuma het Zondo reeds daarvan beskuldig dat hy bevooroordeeld teenoor hom is en politieke propaganda teen hom versprei.

Pres. Cyril Ramaphosa het later gesê die aanvalle op die regbank is kommerwekkend en kan vertroue in die regbank en grondwetlike bestel wegkalwe.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Willem

Hierdie Zuma stigting het seker ook net Graad 4

Michal

Blah blah blah

Pieter

2Jaar is hopeloos te min vir die skade wat hy aangerig het, ten minste lewenslank vir stortkop.

Jerry

Suid Afrika sal verder en verder daal na n wettelose anargie

Magda

Net skuldige mense skop so teen n ondersoek vas , maar ons almal weet zumpie het alles van n ou briefie af gelees en kan die groot getalle eers lees nie, so wie gaan hom nou help met antwoorde by die zondo kommissie