Zuma-onluste: Dodetal styg

Soldate gedurende die onluste in Gauteng. (Foto: GCIS)

Onluste in KwaZulu-Natal en Gauteng het reeds 117 lewens geëis. Dit is ʼn skerp toename oor die dodetal van 72 wat Woensdag bevestig is.

Khumbudzo Ntshaveni, waarnemende minister in die presidensie, het tydens ʼn perskonferensie gesê die situasie in Gauteng is nou “redelik kalm”. Slegs ses voorvalle is oornag aangemeld, danksy bykomende ontplooiing van die SANW, die SAPD en metropolisie in gebiede wat as moontlike brandpunte geïdentifiseer is. Altesaam 10 000 lede van die SANW is tans op die grond ontplooi.

Nog 139 persone is in Gauteng in hegtenis geneem wat die getal inhegtenisnemings op 725 te staan bring. Altesaam 26 sterftes is in Gauteng weens die geweld aangemeld, maar ses liggame is op die dak van Tembisa-winkelsentrum gevind. ʼn Geregtelike doodsondersoek word gedoen. “Hierdie sterftes hou nie verband met die voorvalle van geweld nie,” het Ntshaveni gesê.

Omstandighede in KwaZulu-Natal, die brandpunt van die onluste, bly egter steeds onstabiel, alhoewel dit wil voorkom of vordering gemaak word tot stabiliteit. Altesaam 39 voorvalle is oornag en vandag aangemeld en ʼn bykomende 392 mense is in hegtenis geneem. Dit bring die getal inhegtenisnemings in KwaZulu-Natal op 1 478 te staan. Altesaam 91 sterftes word direk met die geweld in KwaZulu-Natal verbind.

Sy sê die regering is steeds besorg oor lede van die gemeenskap wat self wapens opneem in reaksie teen die geweld en onluste en reg in eie hande wil neem. Sy maan die gemeenskap om met wetstoepassers en gemeenskapspolisiëringsforums saam te werk.

“Die regering is besorg oor die ekonomiese impak van die geweld, plundery en verwoesting van infrastruktuur. Hoofpaaie is die afgelope paar dae versper en kommer word uitgespreek oor die impak op die verskaffingsketting en vervoer van goedere van die hawens in Durban en Richardsbaai na verskeie bestemmings. Lede van die SANW is ontplooi en beamptes van die SAPD sal vragmotors vergesel.” Die gesamentlike operasionele en intelligensiestruktuur (NatJoints) werk daaraan om die N2 en N3 so vinnig as moontlik weer oop te maak.

Sy bedank gemeenskappe wat reeds met skoonmaakoperasies begin het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

14 Kommentare

jongste oudste gewildste
Kokerboom

Die regering leef op ‘n ander planeet

Eugene

Ek sal my wapen gebruik om myself en my familie en andere te beskerm

Anel

Net ‘n 1500? Dan het my oë my bedrieg, want ek het duisende gesien!!!

Vonkprop

Ses liggame op die dak wat nie verband hou met die onluste nie? Lyk my ‘n reeksmoordenaar is ook nog besig.

Persheks Adri

Die regering is besorg, maar sorteer nie die situasie uit nie! Teen die tyd dat alles afgebrand is gaan hulle wakker skrik. Ons beskerm soos ons moet punt. Klomp patete pffft