Twee mense is dood en twee beseer ná ʼn skietery Vrydag by ʼn tehuis in Nederland vir mense met verstandelike of maatskaplike probleme.
Die polisie sê hulle het ʼn man in hegtenis geneem ná die voorval in Alblasserdam, wat uitkyk op die bekende Kinderdijk-windmeule naby Rotterdam, ʼn Unesco-wêrelderfenisgebied.
ʼn 16-jarige meisie en ʼn 34-jarige vrou is doodgeskiet, het ʼn woordvoerder van die polisie op die toneel gesê, aldus die ANP-nuusagentskap.
ʼn 13-jarige seun en 20-jarige vrou het ernstige beserings opgedoen.
“Die verdagte is in hegtenis geneem en daar is beslag gelê op die vuurwapen. Die ooggetuies word versorg en verdere hulp is gereël. Die ondersoek duur voort,” het die Rotterdam-polisie op Twitter gesê.
Die manlike verdagte is al ʼn paar jaar lank aan die polisie bekend “as verward en ʼn pes”, het verskeie Nederlandse media berig.
Die tehuis versorg kinders, jongmense en volwassenes met toestande soos outisme en Alzheimersiekte. Hulle werk op die plaas met diere as ʼn tipe terapie, berig uitsaaier NOS.
Twee nooddienshelikopters het reeds op die toneel geland en verskeie nooddiensvoertuie is buite die plaas gestasioneer.
Gedink gebeur net in SA