Twitter se nuwe baas, Elon Musk, het Vrydag aangekondig dat die platform binnekort verskillende kleure kentekens gaan bekendstel om tussen Twitterrekeninge te kan onderskei.
Maatskappye se rekeninge sal na verwagting teen volgende Vrydag deur ’n goue kenteken uitgeken word en die rekeninge van regeringsinstellings deur grys kentekens. Individue, beroemd of nie, se Twitterrekeninge sal ’n blou kenteken ontvang.
Volgens Musk sal alle geverifieerde individuele rekeninge dieselfde blou kenteken hê, hoewel sommige rekeninge uiteindelik ’n “sekondêre klein logo” sal kan vertoon wat wys dat hulle aan ’n organisasie behoort indien dit as sodanig deur daardie organisasie geverifieer is.
Alle geverifieerde rekeninge sal nou met die hand geverifieer word voordat kleure aan die rekeninge toegeken sal word.
Die aankondiging volg kort nadat Twitter se nuwe baas voorgestel het dat gebruikers betaal om geverifieer te word en ’n blou regmerkie op hul rekening te verkry. Die plan het egter in die hek geduik toe baie rekeninge wat vir die blou regmerkie betaal het, aan die begin van vandeesmaand hulself as wêreldleiers, bekendes of maatskappye voorgedoen het.
Musk het aanvanklik die bekendstellingsdatum vir die nuwe funksie op Twitter tot 29 November uitgestel. Dit is intussen weer uitgestel en dit lyk nou of die funksie op 2 Desember eindelik bekendgestel sal word.
Musk het vroeër gesê hy wil Twittergebruikers laat betaal vir die gebruik van dié sosialemediaplatform om sy inkomstestroom te diversifiseer. Twitter is tans vir 90% van sy inkomste van advertensies afhanklik.
Die helfte van Twitter se top‑100‑adverteerders het sedert Musk die platform gekoop het, aangekondig dat hulle hul besteding op die sosiale netwerk opgeskort het.
Sorry for the delay, we’re tentatively launching Verified on Friday next week.
Gold check for companies, grey check for government, blue for individuals (celebrity or not) and all verified accounts will be manually authenticated before check activates.
Painful, but necessary.
— Elon Musk (@elonmusk) November 25, 2022