Ultramarathon-kampioen geskors oor ‘saamrygeleentheid’ by wedloop

Joasia Zakrzewski (Foto: Firat Topal/X)

ŉ Skotse ultramarathon-kampioen is vir ŉ jaar geskors ná daar bevind is dat sy ŉ motor tydens ŉ 80 km-wedloop gebruik het en daarna die derdeplek-trofee aanvaar het.

Joasia Zakrzewski (47) het op 7 April vanjaar aan die Manchester to Liverpool Ultra 50-byeenkoms deelgeneem. Daar is egter later vasgestel dat sy vir ongeveer 4 km (2,5 myl) in ŉ motor gereis het ná karteringdata gewys het dat sy ŉ myl (1,6 km) binne net een minuut en 40 sekondes afgelê het.

Die dokter, wat naby Sydney woon, het aan BBC gesê dat sy tydens die marathon – naby die halfpadmerk – geweldige pyn ondervind het. Sy het die vorige dag uit Australië gevlieg om aan die ultramarathon deel te neem en het glo vlugvoosheid ervaar.

Sy het ŉ saamrygeleentheid in ŉ vriend se motor na die volgende kontrolepunt aanvaar met die bedoeling om aan beamptes te sê dat sy haar aan die wedloop onttrek.

“Toe ek by die kontrolepunt kom, het ek vir hulle gesê ek onttrek my en dat ek in die motor was, maar hulle het net gesê ‘jy sal jouself haat as jy nou ophou’.

“Ek het daarna ingestem om op ŉ niemededingende manier met die wedloop voort te gaan,” sê Zakrzewski.

Maar toe sy die eindstreep oorsteek, is ŉ medalje en ŉ trofee aan haar oorhandig.

“Ek het ŉ groot fout gemaak met die aanvaarding van die trofee en moes dit teruggegee het. Ek was moeg en het siek gevoel. Ek gooi my hande in die lug. Ek moes die trofee teruggegee het en nie vir die foto’s poseer nie, maar ek het sleg gevoel en nie helder gedink nie,” sê sy.

Zakrzewski sê sy is spyt dat sy nie aan die einde van die wedloop vir beamptes gesê het dat sy nie mededingend gehardloop het nie, maar het bygevoeg: “Dit was nie kwaadwillig nie, dit was net wankommunikasie.”

Wayne Drinkwater, GB-Ultras se direkteur, sê hy het inligting ontvang dat ŉ atleet ŉ “onsportiewe, mededingende voordeel tydens ŉ gedeelte van die byeenkoms” verkry het.

Die derde plek is later aan ŉ ander deelnemer toegeken.