Vermiste kleuter ná 18 dae tuis

Cleo Smith (4) was saam met haar ouers by ’n kampterrein in Wes-Australië toe sy in die nag uit hul tent verdwyn het. (Foto: Facebook / Ellie Smith)

Die vermiste kleuter Cleo Smith (4) wat 18 dae gelede op ʼn kampterrein in Wes-Australië ontvoer is, is “lewendig en gesond” in ʼn geslote huis gevind.

“My naam is Cleo,” het die kleuter aan ’n verheugde polisiebeampte gesê toe dié haar Woensdag in die vroeë oggendure in sy arms opgetel het.

’n 36-jarige man word sedertdien vir ondervraging aangehou. Die man het geen verbintenis met die kleuter se gesin nie.

’n Uitgebreide soektog is verlede maand geloods nadat Cleo en haar rooi-en-swart slaapsak op 16 Oktober uit haar gesin se tent by die Blowholes-kampterrein verdwyn het.

Die kleuter is vanoggend omstreeks 01:00 (Australiese tyd) alleen in ʼn geslote huis in die kusdorpie Carnarvon gevind, ʼn entjie van die plek waar sy verdwyn het, het die polisie in Wes-Australië gesê.

“Een van die polisiebeamptes het haar opgetel en vir haar gevra ‘wat is jou naam?’,” het die polisie se adjunkkommissaris Col Blanch gesê.

“Sy het gesê ‘my naam is Cleo’.”

Volgens Blanch het hy gesien hoe “gesoute speurders openlik van verligting huil” nadat Cleo gevind is.

“Dit gebeur baie min. Dit is iets wat ons almal in ons harte gehoop het, en dit het waar geword.”

Klein Cleo is intussen met haar gesin herenig.

“Ons familie is weer heel,” het die kleuter se ma, Ellie, vanoggend op sosiale media gesê.

Ellie Smith het die betrokke dag opgemerk Cleo is weg toe sy omstreeks 06:00 wakker geword het. Haar slaapsak was ook weg en die ritssluiter van die tent was glo heeltemal oop.

Cleo se verdwyning het wêreldwyd opslae gemaak en die Australiese polisie het ’n beloning van $1 miljoen (byna R11 miljoen) uitgeloof vir inligting wat tot die opsporing van die vermiste kleuter kon lei.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
Bokkiebek

Dankie Here Jesus…dankie dankie dankie dat U die kleinding veilig gehou het en aan haar ouers terugbesorg het… Alle eer kom U toe..

Irene

Ons God is n God op wie daar vertrou kan word, Hy is n God van genade. Kan net dink waardeur almal veral die ouers deurgegaan het vir 18dae. Dankie Jesus vir die kleinding se veiligheid.

Madeleine

Prys die Here!!

LD

Wow!!! Dis baie goeie nuus! So bly die kindjie is veilig! Dank die Vader wat haar beskerm het! Dankie dankie dankie Heer!!

Kan net nie help om te wonder wat presies sy rede was om haar te ontvoer in die eerste plek nie….? Die tipe stories het 99% van die tyd nie ñ goeie einde nie.

Alma

Sjoe, wat ‘n verligting! Ek kan myself nie voorstel waardeur haar ouers die afgelope 18 dae moes gaan nie. So, so bly vir hulle dat hierdie ou dogtertjie veilig terug is by hulle.