Opgestel deur die Podlitiek-span
Foto: Stevepb/Pixabay.com
Die volledige Podlitiek-span is die week weer agter hul mikrofone en bespreek die Wysigingswetsontwerp op Vuurwapenbeheer, die regering se powere pogings tot die plasing van dokters en die jongste besluite rakende onteiening sonder vergoeding.
Rakende die kwessies van vuurwapens en onteiening sonder vergoeding bespreek die Podlitiek-span die sleutelkwessie van mag. Gaan dit werklik om diep ideologiese oorwegings, of is die een en enigste kwessie die ANC se mag?
Die twee kwessies van mag word geskei deur ʼn kwessie van onbevoegdheid. Die regering sukkel twee keer per jaar om jong dokters geplaas te kry, en dit is onaanvaarbaar dat van die belangrikste jong professionele mense so sleg hanteer word, en onder soveel druk hul loopbane moet begin. Is privatisering dalk die pad vorentoe?
Al hierdie stories en meer in hierdie week se Podlitiek.
Podlitiek lewer nie die nuus nie, hulle maak dit. Luister Podlitiek.
- Die Podlitiek-span bestaan uit Hermann Pretorius (IRV), Ernst van Zyl (AfriForum), Paul Maritz (Solidariteit) en Daniël Eloff (Hurter Spies Ing.).
Onse liewe regering wil NIE privatiseer nie, hulle wil alles, ALLES nasionaliseer. Al hoekom hulle dit nog nie reggekry het nie, is omdat hulle so onbeholpe is.
Gelukkig vir ons en ongelukkig vir die ANC hol die binnegevegte die organisasie uit. Dan praat ons nie eers van die los kanon Malema wat skiet volgens die wind waai en dan ‘n salvo netjies in Ramaphosa se ribbes plant nie.